1363/2023-2025

Dated Aizawl, the 3^rd August, 2023:   Vawiin khan Pi Sheryl L. Vanchhong, Mizoram Rural Bank Chairman thar chuan Chief Minister Pu Zoramthanga chu a pisaah a hmu a, Mizoram Rural bank hmalakna tlangpui leh ruahmanna an neihte hrilhin mipuiten tangkai zawka Rural bank an hman theih dan turte an sawi dun.

Chief Minister chuan, Mizoram Rural Bank chu an inzarpharh that avang leh an hnathawh that avangin mipuite hriat an hlawh a, khawvel changkang zelah mitinin Bank nena inthlunzawm kan mamawh vek tawh avangin chumi kawngah chuan MRB hian hna a thawk tha a, kan lawm hle a ni, a ti. Hma an sawn zel theihna tura sawrkar lama mamawh an neihte thlen zel thin turin a chah a ni.

Pi Sheryl L. Vanchhong hian tun hnaiah Chief Minister-in Recapitalisation lama an harsatna a sutkian sak avangin lawmthu a hrilh a, Mizoram Rural Bank chu NE India huapa Rural Bank lian ber, tun hnai maia NABARD pawhin Best Regional Rural Bank-a a thlan an nih thu sawiin, Annual Capital Turn Over pawh hi Crore 4880 chuang a tlin thu a tarlang a ni.

Tunah hian Mizoram Rural bank hian Branch 102 nei mekin thawktu nghet hi mi 475 an awm a, thingtlang hmun kilkhawr zawka mite tan Mini ATM hi 270 nei mekin a dang 75 neih belh tumin hma an la mek a. Financial Inclusion lama hmalaknaah khawtina Self Help Group te nen an thawk ho tha hle niin an sawi a ni.