1362/2023-2025

Aizawl the 3rd August, 2023 : Nimin 2nd August, 2023 khan GST Council Meeting vawi 51-na chu Chairperson Pi Nirmala Sitharaman, Union Minister for Finance & Corporate Affairs kaihhruaiin Video Conference hmanga neih a ni a. Union Minister of State for Finance Pu Pankaj Chaudhary leh State/UT hrang hrang atangin Finance Minister/Taxation Minister (Council Member-te)leh Taxation Officer-te an tel a. Mizoram Taxation Minister Pu Lalchamliana pawh he meeting ah hian telin Taxation Department atangin Pu Vanlal Chhuanga, Principal Secretary leh Pu R Zosiamliana, Commissioner of State Tax bakah Taxation Officer dang ten an tawiawm a ni.

GST Council chuan kum thum chhung lai a lo ngaihtuah tawh, pawisa khelhna hmun (casino) atangte, sakawr intlansiak atanga pawisa inchawina (betting on horse racing) atangte leh online gaming atangte a GST lak dan tur an sawiho va. Heng pawisa khelhna hrang hrang atangte hian GST 28% lak remtih a ni a. Hemi atan hian tuna GST Dan hman mek chu tihdanglam (amend)a ngaih dawn avangin October ni 1, 2023 a hman theih turin Central leh State hrang hrangte chu hma la nghal tura beisei an ni.

Mizoram sawrkar Taxation Department chuan July thla khan cheng vaibelchhe 108.75 a lakhawm a. Hetah hian GST ah Vaibelchhe 79.34, VAT ah Vaibelchhe 27.79 leh Profession Tax ah Vaibelchhe 1.61 a tling khawm a ni. Sorkar kum kal mek 2023-24 chhung hian July thla thleng khan Cheng Vaibelchhe 415.84 a lakhawm tawh a ni.