No.1277/2020-2020

Hnahthial Presbyterian Kohhran chuan vawiin khan Hnahthial District quarantine Centre-a awmte mamawh phuhruk nan District Bawrhsap leh District Level Task Force Chairman ni bawk Pu Vanlalmawia hnenah Rs.50, 000/- (Sing nga) an hlan.

He hunah hian PCI Hnahthial bialtu Pastor Rev.H.Laldintluanga chuan "kan theih tawk tlem mahsela sorkar leh midangte tana kan phak ang tawka luanchhuah hi kan tih tur nia hriain Quarantine Centre-a awmte mamawh phuhruk nan hian he tanpuina sum hi pek nise kan ti a ni"a ti.

Hnahthial District Bawrhsap Pu Vanlalmawia chuan lawmthu sawiin "Covid 19 avanga State danga kan Mizo pui tangkhangte hruai hawnna leh enkawl chhunzawmna tur atan hian Sorkar-in nasa taka buaipuiin hma ala a, mimal leh Kohhran, Pawl hrang hrangte hi tang tlangin kan thawhho a tul tak zet a, kan intanpui tawn hian thawk ho kan nihna a ti lang chiang thin a ni. Tangkhang rawn hawngte hi kan District chhung mi leh sa, kan unaute an ni a, 'sorkarin hmala se, ilo thlir ang' tih rilru pu lovin i tang tlang zel ang u" tiin tangkhang lo hawngte chu sorkar ruahmanna anga khunghran mai an nih thu leh hlauhawm anga en mai lova thinhrik lovin hmangaihna leh lainatna nena lo dawngsawng thin turin a chah a ni.

Hnahthial Presbyterian Kohhran in an theihna anga sorkar lama mawhphurtu te tanpui duhna thinlung pu a, a taka an pen chhuak chu lawmawm leh ropui a tih thu Hnahthial District Bawrhsap chuan a sawi bakah mimal leh pawl hrang hranga tanpuina an dawn thu leh nimin lawkah pawh ramri a duty-te tan VLTF Pangzawl chuan Rs.10000 an pek thu leh lawmawm a tih thu a sawi bawk a ni.

Hnahthial Presbyterian Kohhran hian tuna Rs.50,000/- an pek hma pawh hian District Task Force tanpui nan Rs.5000/- (Sang nga) an lo pek tawh bakah mi harsa thahnem tak an lo tanpui tawh bawk a ni

Hnahthial District quarantine centre-ah hian mi 23 awm mekin midang 125 vel rawn hawng leh tura ruahmanna siam a ni.