172/2024-2025 

Champhai, the 12th April, 2024: District Level Task Force on Ruihhlo Do, District Election Office leh Khuangchera Section, Champhai Vengsang Branch YMA tangkawp buatsaihin zanin dar 7:00 khan Govt. Comprehensive School, Champhai Vengsangah Ruihhlo Do Campaign leh election chungchanga hriattur pawimawh leh vote thlak tura inzirtirna, Systematic Voters' Education and Electoral Participation (SVEEP) Campaign neih a ni.

He hun hmanpuitu District Bawrhsap Pu James Lalrinchhana chuan thalai rual duhawm tak tak kalkhawmte nena hun hman chu nuam a tih thu sawiin, hei hian khua leh tui tha, chhawrnahawm leh innghahna tlak chherchhuah kawngah rah tha a chhuah ngei ka beisei a ti a. Ramri depa awm Champhai District kaltlangin ruihhlo thahnem tak tawlhruk a nih thin thu leh engemawzah district chhungah thlauh a nih thu sawiin, ruihhlo man tur a awm zel avangin kan zavaia tanrual a tul takzet a ni, a ti a. District Ruihhlo Do Committee, District Level Narco Coordination Centre (NCORD) Committee, Nasha Mukh Bharat Abhiyaan (NMBA), Enforcement Agency leh NGO te tangkawpin theihtawp chhuaha ruihhlo an do dante tarlangin, thalaiteah ruihhloin bu a khuar loh nan tanlak thuai thuai a tul a ni, a ti a. Ruihhlo tihchhinin ngawlveina a thlen thu leh hemi atanga chhuah leh a har tawh thin thu sawiin, thalaite chu an nunte uluka, ruihhlo tih chhin tum lo turin a fuih a. Ruihhlo laka thalaite chhanchhuah an nih theih nana tul angte district administration-in a ngaihven reng thu leh engtiklai pawhin mamawhtute tan a inhawn reng thu a sawi bawk.

Champhai District Bawrhsap chuan thalai kalkhawmte chu zirna ngaipawimawh tur leh tum mumal tak neih tum turin a chah a. Bye heart system ringawt ni lo, thiamna tak tak nei tura lehkha zir tur leh rualawhna dik nei turin a chah a. Taksa, rilru leh thlarau nun hriselna dah pawimawh hmasa tur leh, faina leh thianghlimna kawnga entawntlak ni tura theihtawp chhuah turin a fuih a. Thu tha an ngaihthlakte zawm hram hram tum turin a fuih a, nu leh pa, aia upa leh zirtirtute thu awiha zawm tum turin a chah bawk.

He hun hi Pu Malsawmtluanga, Leader, Khuangchera Section, Champhai Vengsang Branch YMA in kaihhruaiin Tv H. Lalruatdika, Fin. Secretary-in programme buatsaih chhan tlangpui a sawifiah a. Pu J. Laltlanmawia, SI, Excise & Narcotics Department leh Pu T. Lalnunsanga, Vice President & Chairman, Kumpuan Sub-Committee, Sub Hqrs. YMA Champhai te'n ruihhlo hmansual chungchang an zirtir a. Dr. Vanlalnunpuii Ralte, SDC & Nodal Officer, SVEEP in election kaihhnawih hriattur pawimawhte zirtirna pein vote thlak tura inzirtirna hun a hmang a. Pu Lalramghaka, Secretary, Khuangchera Section, Champhai Vengsang Branch YMA in lawmthu sawiin hun hman a khar a ni.

He hunah hian Champhai Vengsang Khuangchera Section YMA hruaitu leh member-te, YMA Chhang member-te bakah Vengsang Branch YMA hruaitute leh VC te an tel a ni.