3624/2023-2024

Hnahthial the 2nd February 2024: Vawiin chawhma dar 11:00 khan Hnahthial District Bawrhsap Pu Chuauhnuna kaihhruaiin DC Meeting Hall, Rallang Tlang-ah kumin 2024 Chapchar Kut hman dan tur relin thutkhawmna neih a ni.

Thutkhawm kaihruaitu District Bawrhsap Pu Chuauhnuna chuan Chapchar Kut chu Mizote kut pawmawh ber leh ngaihven hlawh ber te zinga mi a nih angin ropui taka hman ni se a duh thu a sawi a, hnam ziarang leh nunphungte chawinun leh vawnhim nana hman tangkai a nih theih nan duhsakna a hlan a ni. Kalkhawmte chu kum danga lawm tawh thin dan aia tha hria an awm chuan thurawn pe hrehlo turin leh Mizo hnam ziarang vawnnun a chawikan a nih theih nan hmalak dan kawng ngaituaha tan lak pui turin a sawm bawk.

Meeting chuan Kumin Chapchar kut chu Sawrkar in a hun tura a ruat March ni 1 ah Hnahthial Ground No-1, Bazar-ah hman nise tiin a rel a, Kut pa atan South Tuipui Bialtu MLA sawm ni se tiin kut thlengtu atan DC ni se tih a rel. Vawiin meeting chuan  Organizing Committee atan Sub-Hqrts YMA te chu a ruat a, tul ang leh tha an tih angin sub-committee hrang hrang ruatin Kut hman tur hi lo ruahman se, a ti. Kum danga tih thin dan angin department hrang hrangte chu mawhphurhna pek an ni a, Kut hlawhtling tak a nih theih nan an mawhphurhna theuh tha taka hlen chhuak tura ngen leh sawm an ni bawk. Chapchar kut lawmnaah hian mi zawng zawng sawm ni se tih a ni a, heta kal turte chu Mizo hnam ziarang lang thei tura inchei vek tura ngen nise tiin Miss Chapchar kut thlan ni se tih a ni bawk. Vawiin meeting-ah hian Hnahthial District chhunga department hotute bakah NGO hruaitute an tel tha hle.