3623/2023-2024

Dated Aizawl, the 2nd February, 2024: Vawiin khan Chief Minister Pu Lalduhoma kaihhruaiin CM Meeting Hall-ah Mizoram chak lakna kawngpui Vairengte leh Sairang inkar kawng chhe zual thawm vat dan tur leh Four Lane tura hnathawh tan thuai dan tur ngaihtuah a ni a. Pu Vanlalhlana, Minister, PWD , Pu TBC Lalvenchhunga, Adviser to CM leh hnathawh tur kaihhnawih department mi pawimawhte an tel.

He hunah hian Pu Vanlalhlana, PWD Minister chuan kawngpui repair a tul tawhzia te, mipuite mamawh phur thin Truck Owners Association te pawhin Chief Minister hnena an thlen tawh thu leh fur a lo thlen leh mai dawn vanga hmanhmawh a tul thute a sawi hmasa a. Hemi zawh hian hma lak nghal dan tur an sawi zui a ni. NHIDCL lam hian an chanpual chin te chu fur hmaa a tulzual an khawih theih tur thu an sawi a. Forest Clearance a fel chuan Four Lane hna pawh an tan nghal mai dawn tih an sawi. PWD lam te pawhin an enkawl chin chu a chhiat lutuk loh thu leh a tul zual lai an khawih nghal tur thu an tarlang. Council of Minister meeting in a ngaihtuahzui ngai thil te chu Council of Minister meeting neih leh hmasabera agenda atan dah peih hman an tum bawk.

He meeting ah hian PWD, Planning, Environment, Forest & Climate Change leh Law department aiawhte an tel a ni.