3622/2023-2024

Aizawl, the 2nd February, 2024: Vawiin chawhma 10:30 khan, Chief Engineer, Irrigation & Water Resources Department (IWRD) Conference Hall, MINECO-ah IWRD hnuaia Official-te’n Technical Staff Meeting an nei a, hr hun hi IWRD Minister Pu P.C. Vanlalruata’n a hmanpui.

IWRD Minister Pu P.C. Vanlalruata chuan sawrkarin policy leh framework a duante tarlangin, department official kalkhawmte chu kuthnathawktute hmasawn nana theihtawp chhuah turin a chah a. Department hnuaia thawktu indaihlohnate pawh a ziaawm theih nan hmalak mek a nih thu sawiin, sum indaih lo hle mah se, buh leh thlai chawmna tur tuilakna tha siam chu sawrkar flagship programme pakhat a nih avangin mamawh zualpui ang angte hnawh khah a nih theih nan hma lak zel a nih tur thu a sawi bawk.

Pu P.C. Vanlalruata chuan IWRD hnate chu hun bi neia thawh ngai a nih avangin a hun taka hna thawh zung zung a pawimawh thute leh, department mai piah lamah ram pumpuiin hma a sawn zel theih nan central atanga sum haichhuak thei turin project tha leh chhenfakawm turte duang chho zel turin a fuih a. Minister chuan department official-te an hna tluang taka an thawh zel theih nan duhsakna a hlan a; ram tan theihtawp chhuah zel turin a fuih bawk.

He hun hi Dr. H. Lalthlangliana, Secretary, IWRD chuan kaihruaiin, department hnuaia division hrang hrangte atangin report ngaihthlak a ni a. IWRD Department kaltlanga Mizoram hmun hrang hranga PMKSY, NABARD RIDF leh Scheme pawimawh hrang hrang hnuaia hmalakna kal mekte leh hmachhawpte sawiho a ni.

Er. Lalrotluanga, Chief Engineer, IWRD chuan lawmthu sawiin, Minister kaihhruaina hnuaiah project-te pawh tangkai leh tha zawka kalpui zel theih a beisei thu a sawi a. Hemi hnu hian Office hmunhma leh Laboratory-te Minister hova enfiah niin, Technical Session neih chhunzawm a ni.