2319/2024-2025

Dated: Mamit the 1st of October, 2024 : Vawiin khan Mamit District Secondary Sport vawi 22-na chu Pu Jacob Lalawmpuia, District Bawrhsap leh Chairman DEC ni bawk chuan GSA Playground, Mamit-ah a hawng. 

Pu Jacob Lalawmpuia chuan Mamit District Sport hmang tura kalkhawm zirlaite chungah lawmthu a sawi a, ram hmasawnna atana pawimawh ber chu zirna hi a ni a, Mamit District pawhin hmasawnna kawng kan zawhnaah duhkhawp loh lai te la awm thin mahse tun atanga tan kan lakna hian rah tha a chhuah ngei a beisei thu a sawi a. Bawrhsap chuan  zirlaite puitling tur a chher chu zirtirtuten kan tum tur a ni a, zirlaite pawh kan mimal, kan chhungkua leh khawtlang tidanglam thei turin theihna kan nei a, lehkha thiam lam a harsatna kan nei a nih pawhin theihna dang infiamna hmanga zawnchhuah a nih theih nana District huap Sport te hi buatsaih a nih thu a sawi bawk. Insumtheihna, mahni inthunun theihna hi hlawhtlinna atana hmanraw tangkai a ni a, ruihhlo kaihnawih laka fihlim tlat tura mahni inthunun turin zirlai kalkhawmte chu a chah bawk a ni.

Vawiin hun hi Pu K. Lalnunfela, Chairman, Organising Committee/ District Education Officer chuan a kaihruai a, Pu Joseph Lalfakawma, Secretary, Technical Committee kaihruainain Oath Taking neih a ni.

 K.Laltanpuia, Secretary Organising Committee-in report a pek danin Mamit District Secondary Sport-ah hian School 20 an tel a, khaw pawn atangin School 14 leh khawchhung atangin school 6 an ni a, Items 10 ah inelna neih a ni anga, District Sport inelna a titha thlanchhuahte hian Mizoram huap High School Sport inelna Kolasib-a neih turah Mamit District ai an awh ang.