2320/2024-2025

Dated Serchhip, the 1st October, 2024: Vawiin khan Chief Minister Pu Lalduhoma chuan Serchhip Sports Complex ah Serchhip District Secondary School Sports Meet 2024 a hawng. Zirlai naupang 1000 vel kal khawm te chu ruihhlo laka fihlim ngei tur leh nun kawng pangai tak zawh tlat turin a chah a. "Nakin lawka Mizoram la enkawltu tur te an ni tih inhrereng rawh u" a ti.

Chief Minister chuan, Serchhip District chuan tunhnaiah infiamna lamah hma a sawn nasa tih sawiin, Badminton, Football, Boxing, Taekwondo leh discipline thenkhatah India rama lang phak kan nei nual a, a lawmawm hle. Sawrkar hnaah kan vaia luhna tur a awm loh avangin kawng danga talent tha tak takte chuan lo tipung ula, lo bei zel rawh u. Talent hai chhuah kawngah pawh tan ila zel ang u. Kan thalaite hi sawrkar chuan a thlahthlam ngai dawn lo che u a, infiamna hmunhmate pawh a theih ang angin kan thuam tha chho zel dawn. Serchhip Sports Complex pawh hi mi inphalten infiamna hmun atana an pek a ni a, an pek ang takin infiamna ruhrel tha tak tak sak nan kan hmang zel ang. Tunlaiah sualna a pung nasaa, Serchhip khawpui ngei pawhin kan tuar hle tih kan hria. Nangni zirlai naupang duhawm tak tak te hi chuan pangai takin in nun rawn hmang ang che u. Mi chungchuang nih a har a ni thei, mi pangai nih erawh chu thil harsa a ni lo. Nun kawng pangai tak zawh ula, in taksa, in rilru leh in thlarau tan thlengin chu chu malsawmna a ni dawn a ni, a ti. 

Sports meet hawnna inkhawm hi Pu David Laldintluanga, Chairman, Serchhip District Secondary School Sports Committee chuan a kaihruai a, Pu Richard Lallawmkima, Asst. Secy, SDSSSC chuan report a pe a ni.

Infiamna mipa tan chi 19 leh hmeichhe tan chi 17 a awm dawn a, sikul 19 atangin infiammi 600 vel an fuankhawm a. Zirlai naupang kal khawm zawng zawng hi an vaiin 1000 vel an ni.