2321/2024-2025

Dated Aizawl, the 1st October, 2024: Vawiin chawhma dar 10:00 a Central Sector Scheme thenkhat UNNATI, MSME, RAMP leh adangte chungchang inhrilhhriatna hun 'Workshop for UNNATI, MSME, RAMP and Other Schemes', Aijal Club-a neih chu Pu F. Rodingliana, Hon'ble Minister, Commerce & Industries chuan khuallian niin a hmanpui.

Khuallian Minister Pu F. Rodingliana chuan Commerce & Industry pawimawhna leh Department-a thawktute fuihna thu sawiin, Sawrkar policy kal laiah Commerce & Industries Department chu zaa sawmli chuang lai chang thei Department a nih avangin mipuite rawn tluk luh tam ber fona tur a nih thu a sawi a; hriatthiamna zau tak nena lo chhawn thin turin Department hotute chu a chah a. UNNATI leh Bana Kaih Scheme-te thlunzawm dan tur ngaihtuah zel chu ram chawikanna tura thil pawimawh tak a ni tih sawiin, hemi atan hian sawrkar pawhin budget-ah a hranpa liau liaua sum a dah dante a tarlang bawk a. Workshop chu ram siam thatna tur atana mellung nise a duh thu sawiin, Mizoram chu India ram kilkhawra awm State pakhat ve mai ni lova, khawchhak lam tana India ram luhka pawimawh tak kan nih theih nana theihtawp chhuahpui turin a sawm a ni.

Workshop hi Pi Maria CT Zuali, IAS, Director, Directorate of Commerce & Industries chuan kaihruaiin, Dr. Lalzirmawia Chhangte, IAS, Secretary, Commerce & Industries Department, Govt. of Mizoram-in kalkhawmte hnena workshop neih dan tur tlangpui a sawifiah a. Hemi zawh hian Pu Mark Lalduhsaka, State Lead Project Manager, RAMP Project- Mizoram-in MSME RAMP & ‘Bana Kaih’ Policy tih thupui hmangin presentation a nei a. Pu PC Lalvuana, Joint Director, Commerce & Industries Department, Govt. of Mizoram chuan UNNATI 2024 Scheme chungchang presentation a nei a. Pu HB Lalremmawia, Promotion Officer, Commerce & Industries Department pawhin  PMFME/ODOP chungchang presentation neiin, Pi Melody Ngurthansangi, Joint Director, Commerce & Industries Department chuan PM Vishwakarma and MSME tih thupui hmangin presentation a nei a. Information & Communication Technology (ICT) Department lam atangin E-Marketing/ONDC chungchanga presentation bengvarthlak tak ngaihthlak a ni bawk.

Vawiina workshop neih hi Mizoram chhung District hrang hrang atanga District Commerce and Industries Officer (DCIO) te leh a kaihhnawih Department hnuaia thawktute tana buatsaih a ni a. Workshop kaltlang hian Central Sector Scheme (CSS) te leh Mizoram Sawrkar policy 'Bana Kaih' thlunzawm dan kawng inhrilhhriatna neih a ni.