Mamit District Bawrhsap Pi Lalbiaksangi chuan West Phaileng block chhunga sorkar hmalak mekna te en in, khawtlang mipui te leh Commandant, 181 Bn. Border Security Force nen thawhhona tha zawk neih theih dan tur sawiin an inkawm.

Bawrhsap hian West Phaileng a Industrial Training Institute sak lai mek en in, West Phaileng Block chhunga Anganwadi sak lai leh thuam that te a en a. India leh Bangladesh ramri (Indo-Bangla Border Fencing/IBBF) hungna in a khawihbuai khua: Hnahva, Silsury, Marpara ‘N’; ah khawtlang mipui te kawm in, heng khua ten tanpuina an dawn tur chungchangah Bawrhsap chuan khaw tin te IBBF Fund hmandan turah Village Committee din a, Bank Account hawng turin a ti a, tanpuina sum dawn te khawtlang hmasawnna tur Community Centre, Health Centre, Tui dahkhawlna tur leh Zirna In sakna tura duan anih avangin khawtlangin hma sawn nan hna tha taka thawk turin a chah. Nu naupai te damdawiinah ngei nau nei thin tur leh hridanna pek beihpui neih leh turah pawh mahni tu leh fate hridanna lak tir ngei tura chahin, hriselna ngaipawimawh turin khaw mipui te a chah bawk a ni. West Phaileng Block chhunga Primary Health Centre awm te Bawrhsap hian tlawh bawkin, a thawktu te kawmna a nei bawk.

Bawrhsap hian Pu Anil Thakur, Commandant 181Bn.BSF kawmin, district huamchhung ramri hrula hmasawnna hnathawh hrang hrang te him taka thawh a nih theih nana thawhho dan tur leh sorkar hmalakna hrang hrang a thawhho dan tur te an sawi a. Hridanna beihpui kal meka damdawi sem kawngah te leh ramri hrula kawng siam mekah te 181 Bn.BSF te hian an theihtawpa hnathawkte venhimna pek leh thawhpui an inhuam thu an sawi a ni. District chhung hmun hrang hrang a inkhuar mek 181Bn.BSF te BOP hrang hrang Bawrhsap hian a tlawh bawk.

Attachment

  • Loading attachment...