611/2024-2025

Champhai, the 30th May, 2023: Champhai District Football Association (CDFA) in kum 25 a tlin puala a lawmna hun vawiin chawhnu dar 3:00 a Chhangphut Field, Champhaia a buatsaih chu District Bawrhsap Pu James Lalrinchhana, Chairman, District Sports Committee (DSC) chuan khuallian niin a hmanpui. Silver Jubilee (1999-2024) hriatreng nana buatsaih lungphun a hawng nghal bawk.

Khuallian Pu James Lalrinchhana chuan Champhai District Football Association te'n kum 25-na hmel an hmu chu thinlung taka a lawmpui thu a sawi a. Champhai District-ah hmasawnna ruhrel dangte thlahthlam chuang lovin zirna, hriselna leh infiamnate ngaihpawimawh zual a nih thu a sawi a. District Sports Committee hnuaiah Sawrkar pawmpui sports discipline 30 a awm thu sawiin, football chu heng zinga a nung tha berte zinga mi a ni chu fakawm a tih thu a sawi a. Kum 25 chhunga CDFA hlawhtlinna hrang hrangte tarlangin, hruaitu hmasa atanga vawiin thlenga hruaitute inpekna chhuanawm tiin, hei hian tun dinhmun min hruai thleng a ni, a ti bawk.

District Sports Committee Chairman ni bawk Pu James Lalrinchhana chuan football avanga thalai tam takte'n ruihhlo leh nunkawng hrisel lo an kalsan chu ropui a tih thu sawiin, Chhangphut Field cheibawl leh zan lam thlenga inkhelh nana ruahmanna siam a ni chu lawmawm a tih thu a sawi a. Pawl nung leh chak tak an nih zel theih nan CDFA hruaitute chu an hmalaknate chhunzawm zel turin nakin zel atana hruaitu tha chher chhuah tum turin a fuih a. Thalaite'n taksa leh rilru hrisel an neih theih nana theihtawp chhuah chhunzawm zel turin a sawm nghal bawk.

Thusawitu dang Mizoram Football Association (MFA) Sr. Vice President Pu PC Vanlalhruaia chuan Champhai District Football Association-in silver jubilee a thleng chu MFA in a lawmpui thu a sawi a. Football chu infiamna mai nilo eizawnna a nih tel thu sawiin, mizo thalaite chu India rama player hlawh sang tak takte an nih hlawm tawh thu a sawi a. Football chawisan kawnga Champhai District Football Association hmalakna MFA in a ngaihven reng thu sawiin, hmalak lehzelna kawnga thawhhopuiah a sawm nghal bawk.

He hun hi Pu C. Hualrikhuma, President, CDFA Champhai chuan kaihruaiin Honorary Secretary Pu K. Lalremsiama'n inhmelhriatna hun a hmang a. CDFA President hmasa ber Pu Lalnunmawia, Advisor, CDFA-in Champhai District Football Association lo pianchhuah dan leh Chhangphut Field chanchin a sawi a. Pu K. Zoramsangzela, Silver Jubilee Organizing Secretary kaihhruaiin Champhai District tihmingthatu football player hlawhtlinna chang mi 48 te chawimawina hun hman a ni.

Champhai District Football Association (CDFA) hnuaiah hian Zone Football Association 5, Zokhawthar Zone, Hnahlan Zone, Khuangleng Zone, Khawbung Zone leh Farkawn Zone-te  awmin, Direct Affiliated Club First Division-ah Football Club 6 leh Second Division-ah Football Club 13 an awm mek a. First Division leh Second Division Leaque mumal tak an kalpui bakah naupang tan MFA nena tangkawpin Grassroot Football Academy mumal tak an kalpui a. Eight Foundation, Delhi bultumin Baby League kalpui niin, hei hi Reliance Foundation Youth Sports (RFYS), Mumbai chuan an chhunzawm a. Referee Development Course an buatsaih thin bawk a, kum 25 chhung hian MFA buatsaih tournament-ah an champion kim vek a, MPL ah player thahnem tak an thawh bakah India rama Club hrang hrangahte pawh CDFA hnuaia player-te'n an khel tawh bawk a ni.