612/2024-2025

2024 Ṭomir thla ni 30: May ni 27 & 28, 2024-a ‘Cyclone Remal’ thawk chuan India Hmarchhak pum pui (Mizoram tiama) nuaiin, thlipui leh ruah sur nasa avangin chhiatna nasa tak a thlen a. Vanneihthlak takin, Lawngtlai District-ah erawh kawngpui dunga lei min leh chirh tawlh vanga kawng ping leh sikul/chenna in chhia tih loh chu nunna chan kan awm lo hlauh a, a lawmawm hle a ni.

Cyclone a lo thawh hian Lawngtlai District Administration/District Disaster Management Authority chuan chhiatna thleng thei ven leh harsatna chin fel kawngah rang takin hma a la nghal a. Deputy Commissioner, incident commander-te leh Lawngtlai (Sadar), Chawngte leh Sangau Sub-Division SDO-te'n a ṭul angin an huam chhungte chhiatna leh harsatna thleng a awm leh awm loh enin an tlawh kual bawk a. Harsatna leh chhiatna lian zawk a thlen loh nan heti ang hian a ṭul angin chet chhuah nghal a ni.
 
1. May 27 & 28, 2024 te khan KMMTTP kawngpui Rulkual Junction leh hmun hrang hrangah lei min/chirh tawlh vangin kawng a ping a. District Administration chuan report a dawn veleh a kaihhnawih department-te/MPWD/Contractor-te hriattir nghalin, lei vung then fai hna hi thawh nghal a ni a. Ruah a sur deuh reng avangin leh a khat tawka lei a tlak reng avangin hmun remchang laiah lei laih khawl leh leivung paihna lirthei te chhawp niin, a ṭul angin kawng then fai hna hi thawh chhunzawm reng a ni.

2. May 28, 2024 khan Lawngtlai leh Siaha inkar NH-54 kawngpui chu hmun hrang hranga lei min leh chirh tawlhin a hnawh pin avangin lirthei leh khualzin eng emaw zat chu kawng lakah an tangkhang a. A kaihhnawih department-te/MPWD/Contractor-te hriattir an nih veleh lei vung then fai hna hi thawh nghal a ni a. Lei min nasa avang hian khualzin veivak turte’n harsatna an tawh loh nan kawng pawh khar lailawk a ni a. Khualzin tangkhangte chu chaw leh an mamawhte a ṭul anga pek an ni bawk a. Ruah a sur reng avang leh lei a tlak reng avangin kawng then fai hna hi zankhuaa thawh a ni a. Lawngtlai leh Kawlchaw West (Lawngtlai District) inkar kawng hi tunah chuan lirthei tlan theiha tihtlang tawh a ni a. District Administration aṭangin uluk taka vil reng a ni.

3. May 28, 2024 khan Lawngtlai to Tuipui Ferry Road chu lei min avangin kawng a bal a. Lirthei tlan tlang theih lohva awmin, kawng pawh khar lailawk a ni. A kaihhnawih department-te/MPWD/Contractor-te hriattir niin, lei vung then fai hna leh kawng siam ṭhat hna hi thawh nghal a ni a. Tunah chuan lirthei tlan theih turin siam ṭhat tawh a ni.

4. May 27, 2024 zingah khan Mualbu ‘L’ Upper Primary School chu thliin nuaiin, a sawp chhia a. District Administration chuan preliminary report dawng tawhin, a ṭul angin bawhzui nghal a ni.

District Administration chuan chhiatna leh harsatna thleng chin fel a nih theihna kawnga mahni insengsova tha thawhtu mimal leh tlawmngai pawlte chungah lawm thu a sawi tak meuh a. Sawrkar department, official leh contractor-te thawhpuina leh mipuite thlawpnaah lawm thu a sawi bawk a ni.

District Administration chuan chhiatna thlen thulhah fimkhur tur leh sawrkar thu chhuak ngaichang ṭhin turin mipuite a ngen a. Chhiatna leh harsatna thlengte chin fel zung zung a nih theih nan incident commander-te hriattir vat ṭhin turin mipuite a chah bawk a ni.

Attachment

  • Loading attachment...