Dt 7-9/February chhung khan Pi Lalbiaksangi Mamit District Bawrhsap chuan Mamit District khaw hrang hrang West Phaileng, Hnahva, Silsuri leh Marpara khuate tlawhin IBBF BADP hnuaia hna thawh mekte bakah Border Fencing te a enfiah a. Silsuri khuaah vantlang inkhawm an nei bawk.

District chhunga Multi-sectoral Development Programme (MSDP) hnuaia ITI Building West Phailenga sak mek chu tlawhin an hnathawh dan that leh that loh a hmunah a thawktu contractor te nen enin thil tul hrang hrang tih belh ngai leh tih that ngaite a sawipui a ni.

District Bawrhsap chuan Hnahva, Silsuri leh Marpara khua ah te IBBF BADP hnuaia vantlang tana hman tangkai tur an siam Tuizem, Playground, Bazar Shed bakah School te a enfiah a. Heng a khaw tlawh hrang hranga hmasawnna hna thawh mekte chu neitu rilru pu-a, duat taka enkawl tur leh a buaipuituteah chauh innghat lova mipuite'n thlawp tha a tawiawm tlat turin a ngen a ni.

Silsuri khua-a vantlang inkhawm neihnaah thu sawiin Pi Lalbiaksangi chuan Silsuri khaw mipuite chu tuna an awmna hmun atanga permanent settlement site a insawn turin a ngen a. Compensation la tawhte phei chu a rang thei ang bera thuawih taka insawn turin a ngen a. Tuna an chenna hi Sorkarin Land Acquisition Act 1894 dan hmanga a lak tawh niin mipuite’n chanvo an neih tawh loh avangin an awmna tur hmun tharah chuan a rang thei ang bera insawn turin a chah a ni. Tuna an awmna tur hmunah hian Sorkarin a khaw mipuite hman tur thil tha tak tak a siam mek thu sawiin an tan chetlak a awlsam zawk dawn thu a sawi.

District Bawrhsap chuan ram kang tur ven a tul thu sawiin March Ni 15 hma ngeia lo hal vek turin a hrilh a. March Ni 15 hnu lama lo hal reng reng chu dan kalh a ni a, Police man theih an nih dawn avangin mipui kalkhawmte chu dan zawm ngei turin a chah. Hriselna lam ngaihthah lo tura chahin Sorkar hmalakna hnuaia hri danna hrang hrang leh damdawi a thlawna sem chi hrang hrangte ngaipawimawha lo la ngei zel tura hrilhin, faina leh thianghlimna kawngah pawh tan la sauh sauh tur leh Mizoram chu India ramah HIV/AIDS vei tam lama pahnihna kan nih avangin HIV/AIDS laka fimkhur turin a chah bawk.

Indo Bangla Border Fencing (IBBF) hnuaia Border Fencing hna thawh meka harsatna hrang hrang kan District mipui, ramri hnaiha chengte’n an tawh chu Madhukar Gupta Committee Chairman February Ni 8 a Border Fencing rawn tlawhtu hnenah a lo thlen a, mipuite hmakhawngai chunga Fencing awmna hmun tur chu thlansak turin a ngen a, Silsuri khawtlang hruaitute nen BSF hotute an hmu bawk a ni. District

Bawrhsap chuan Marpara PHC tlawhin an hmalakna hrang hrangte a enpui a. Hriselna kawnga Sorkar hmalakna hrang hrangte chu bawhzui tha tura chahin National Programme For Control of Blindness (NPCB) hnuaia Marpara PHC-a mit a thlawna zai mi 27 an nei thei chu lawmawm a tih thu a sawi bawk.

District Bawrhsap hi Pu Lalropuia Hmar, EE, PHED Mamit, Pu Lalhmachhuana SDC Mamit, Pu Paul Rokima, DIPRO Mamit,Pu Lalhnehliana Sailo A.E, DRDA te bakah khawtlang hruaitute’n an tawiawm a ni.