Vawiin khan Health Minister Pu Lal Thanzara hovin Zarkawt Recreation Centre-ah National Deworming Day (NDD) hman a ni a. National Deworming Day hi Mizoram district zawng zawngah a ruala hman niin, naupang kum 1 leh kum 19 inkar sikul kai leh kailo, sawrkar leh private sikul ami te rulhut damdawi (Albendazole) a ruala eitir an ni.
He hunah hian Health Minister Pu Lal Thanzara chuan National Deworming Day chu rulhut pai vanga natna hrang hrang thleng theite, thisen tlakchhamna leh naupang than ti thu tu um bo nan sawrkar laipui hmalakna a nih thu a sawi a. National Deworming day hi India ram pumah leh Mizoramah February 2016 atanga hman thin tawh niin , August ni 10, 2016 a hman tumah khan naupang sikul kai leh kailo 82% laiin rulhut damdawi an ei thu Minister hian a sawi bawk. Mihring nuna zirna, hriselna leh seilenna atan hun pawimawh ber chu kum 1 atanga kum 19 inkar a nih thu leh hei hi hriain zenghri umbo tur te, thisen tlakchham ven nan National Iron Plus Initiative (NIPI) te, Rastrya Bal Swastha Karyakram(RBSK) te hmangin heng naupang thanglai te hian hriselna tha zawk an neih theih nan sawrkarin hma a la mek tih Pu Lal Thanzara chuan a sawi. Tu leh fate hriselna atan a tangkai em em a ni tih hre chungin Health Minister chuan rulhut damdawi eitir hi ngaipawimawh turin nu leh pate a chah bawk a ni.
National Deworming Day hi National Health Mission, Health & family Welfare Department buatsaih niin Dr. K. Ropari Principal Director chuan kumtin thla 6 danah School naupangte hnenah rulhut damdawi an sem thin thu leh rulhut pai avanga natna hrang hrang thleng thei te a sawi a. He hun hi Health & Family Welfare Commisioner Pu Lalrinliana Fanai chuan a kaihruai a, State Programme Officer (RCH) Dr.K Vanlalsawma’n mihringin rulhut a pai theih dan leh rulhut hlo thawhdante sawifiahin, Dr. Lalthlengliani State Nodal Officer (RBSK/RKSK) chuan lawmthu sawiin hun a khar a ni.
National Deworming Day-ah hian naupang kum 1 atanga kum 19 inkar zawng zawng te tan rulhut damdawi, Sikul, Anganwadi leh ASHA kaltlangin sem a ni a. Rokhawlhna avanga vawiin a dawng ve theilo tan February ni 15, 2017 ah hian “Mop Up Day” neih leh tum niin rulhut damdawi hi sem a ni leh dawn a ni.
