527/2023-2024

Champhai, the 22nd May, 2023: Khawzawl District Volleyball Association (KDVA) buatsaih Season Opening Tournament 2023-2024 hawnna Khawzawl District Volleyball Court, Dinthar venga neih chu Khawzawl District Bawrhsap Pu K.Lalrohlua chuan vawiin chawhma dar 10:30 khan khuallian niin a hmanpui.

Khuallian Pu K.Lalrohlua chuan nikum lamah State Level Volleyball inelnaah Khawzawl District-in result tha tak a nei chu lawmawm a tih thu sawiin, player-te chu hmasawnna vawng nung zel turin a chah a. Faina kawngah Khawzawl leh District chhung khaw hrang hrangte khaw dangte entawn mek a ni chu lawmawm tiin, hmasawnna changkang tak chu vawngnung reng tura chahin, tournament neih chhung zawngin infiamna hmunhma leh avelte fai taka vawng turin a chah bawk a ni.

District Bawrhsap Pu K.Lalrohlua chuan infiamna chu eizawnna tlak leh ruihhlo dona hmanraw pawimawh pakhat a nih thu sawiin, infiammite chu ruihhlo laka fihlim turin a chah a. Khawzawl atangin infiamna khawvela mi hlawhtling tak Pu Robert Lalthlamuana leh midangte kan nei hi a ropui tak zet a, thalaite'n i entawn zel ang u, a ti bawk a. Khuallian chuan tunhnaiah HSLC leh HSSLC result chhuakah Khawzawl District chuan result tha tak a neih thu pawh sawi langin, hetiang dinhmun thleng tura zirtirtute thawhrimna leh inpekna chu fakawm a tih thu a sawi bakah, kumin HSLC leh HSSLC-a hlawhtlinna chang zawng zawngte lawmpuina a hlan bawk a. Ruihhloin kan ram min run mek thu sawiin, ruihhlo do kawnga hmanraw pawimawh tak infiamna chawinung zel turin thalai kalkhawmte a fuih bawk a ni.

Khawzawl District Volleyball Association (KDVA) Season Openning Tournament, 2023-2024 ah hian mipa team 19 leh hmeichhe team 9 an tel a; tun thla May ni  27, 2023 thleng he tournament hian a awh dawn a ni.