528/2023-2024

Aizawl, 22.05.2023: Chief Minister Pu Zoramthanga hovin vawiin khan cabinet meeting room-ah Empowered Committee for Investment in Mizoram chu an thukhawm a. Ministry of DONER in a buatsaih North East Global Investors Summit (NEGIS) a Mizoram tel ve na tur chungchang an sawiho a ni.

NEGIS 2023 ah hian India ram chhung leh pawnah India hmarchhaka investment nasa zawk a luh theih nan roadshow neih a ni dawn a. Chumi atan chuan Mizorama investment tih theihna project hrang hrang chhawpchhuah theih tur vawiin hian sawiho a ni a. Chung zingah chuan tourism, skill (nursing, hospitality, garment making, entertainment etc.), sports, tourism, food processing, education, etc. lama potential nasa tak awm te sawiho a ni a. He hmalakna kal zela tunhnaia sawrkar department leh state pawn sumdawng mi te inkara thawhhona chungchang sawiho an lo neih tawhte sawichhuah a ni bawk.

NEGIS roadshow leh pre-summit hi May ni 29, 2023 atangin Mumbai, Dhaka, Hyderabad, Kolkata ah te neiin August ni 19, 2023 ah New Delhi ah Ambassador Meet neih tura ruahman a ni a. Heng ah te hian state te'n investor te hnenah state chhunga investment ti tura theihna awm hrang hrangte entir a a sawifiahna neih a ni dawn a ni.

Vawiin meeting-ah hian Tourism Minister Pu Robert Romawia Royte, Chief Secretary Pu Navin Kumar Choudhary, Planning Secretary Pu Lalmalsawma Pachuau leh committee member dangte an tel a ni.