529/2023-2024

Champhai, the 22nd May, 2023: Vawiin chawhnu dar 1:00 khan Champhai District Bawrhsap Pu James Lalrinchhana hovin DC Conference Hall-ah June ni 30-a Remna Ni 2023 Champhai District-a hman dan tur rel a ni.

District Bawrhsap Pu James Lalrinchhana chuan Mizoram State tana ni pawimawh tak Remna Ni hman dan tur State Sawrkarin a duan zulzuiin District tinah pawh karkhat chhung awh a lawmna pual hun hman tum a nih thu a sawi a. Program hlawhtling tak huaihawt a nih theih nan mawhphurhna hrang hrang neite theihtawp chhuah theuh turin a chah a ni.

Meeting chuan Remna Ni Vawi 37-na lawmna chu Kahrawt Community Hall-ah hman nise tiin a rel a. Remna Ni lawmna pual hian Painting Competition, Photography Competition, High School leh Higher Secondary School Zirlaite pualin Remna Ni lam hawi Quiz Competition leh Essay Competition-te neih ni se tih a ni a. Digital Flyer leh Video tawi insiamsiak huaihawt ni se tih a ni bawk.

Heng bakah hian meeting chuan Remna Ni pual hian June ni 30, 2023 hian Health & Family Welfare Department kaltlangin Free Health Camp leh Blood Donation Camp neih nise a ti a. Remna Ni zingkarah Peace Walk, CHANEM tualzawl atanga Circuit House tualzawl thleng neih ni se tih a ni a. Thingphun hnatlang leh faina hnatlang neih nise tih a ni bawk a. Mawhphur tura ruat sub-committee peng hrang hrangte chu June ni 9, 2023 ral hmaa hmalakna report thehlut hman tura tih an ni bawk.