429/2024-2025

Champhai, the 7th May, 2024: Champhai District Bawrhsap Pu James Lalrinchhana, Chairman, District Level Committee on Myanmar and Bangladesh Refugees ni bawk chuan vawiin chawhnu khan Khuangleng khaw lu-a raltlante awmna hmun Refugee Camp a tlawh.

District Bawrhsap Pu James Lalrinchhana chuan thenawm ram Myanmar buai avanga sahimna zawnga rawn raltlante awmna camp a tlawhnaah hian Khuangleng Village Level Committee on Myanmar and Bangladesh Refugees-te ruahmannaa an tana chenna leh nitin mamawh phuhruk a nih dante uluk takin a enfiah a. Raltlan khuahkhirh leh chhawmdawl kawngah Village Level Committee-te chu District Level Committee thuchhuah leh Sawrkarin inkaihhruaina a siamte tha taka kengkawh turin a chah a. Thuthar leh hmalak ngaite bawhzui nghal zel tur leh District Level Committee hnena thil awmzia thlen nghal zel turin a chah a. Raltlante pawh ram dante leh sawrkar thuchhuahte tha taka zawm tura chahin, khawtlang hmalakna tha taka thlawpa tawiawm zel turin a chah nghal bawk.

Khuangleng Village Level Committee on Myanmar and Bangladesh Refugees tarlan danin tun dinhmunah Khuangleng khuaah hian Myanmar atanga raltlan mi 84 vel an awm mek a; an zinga mi 64 hi Refugee Camp-ah awmin a dang 20 te hi khawchhungah in luahin an khawsa a ni.

Pu James Lalrinchhana hi Sawrkar Official-te bakah Khuangleng VCP Pu TC Thangpuia leh Village Level Committee on Myanmar and Bangladesh Refugees member dang te'n an tawiawm a ni.