428/2024-2025

Champhai, the 7th May, 2024: National Bank for Agriculture and Rural Development (NABARD) sum cheng nuai 15 senga Northeast Initiative Development Agency (NEIDA) kaltlanga sak, thlai thar chhuah, sa leh kutthemthiamna kaltlanga thil dehchhuahte zawrhna tur hmun Khuangleng Rural Haat chu vawiin chawhma dar 10:30 khan Champhai District Bawrhsap Pu James Lalrinchhana chuan a hawng.

District Bawrhsap Pu James Lalrinchhana chuan Khuangleng khawtlangte mamawh leh rualawhna tipuitling tura a bultanna pawimawh tak Khuangleng Rural Haat hawnfel a ni chu lawmawm a tih thu sawiin, hei hian thawhhona tha tak hnuaiah a kaihhnawih hrang hrang te'n lungrual takin hma an la tlang tih a entir a, khawtlang tana an thahnemngaihna hi a chhuanawm hle a ni, a ti a. Bazar thutna tur bakah a kentel store room, toilet, tui leh a hmunhma cheibawl dante chu fakawm a tih thu sawiin, a nihna ang tur taka sum dawnte hman tangkai a ni chu entawntlak a tih thu a sawi bawk.

District Bawrhsap chuan DDM, NABARD Champhai thahnemngaihna leh tanlakna fakawm tiin, District chhunga Line Department hrang hrangte inkarah thawhhona tha tak a awm zel thin chu lawmawm a tih thu a sawi a. Khuangleng Rural Haat chu kuthnathawktute tana sum leh pai lakluh bultanna hmun pawimawh tak, tangkai leh chhawrnahawm tak a nih ngei a beisei thu a sawi a. Kalkhawmte chu hlawk zawka buh leh bal thar dan mithiam zawkte rawn chunga kalpui tum turin a chah a; hemi kawngah hian Line Department-te biakpawh reng theih an ni, a ti a. Khawtual mai nilo pawn lam thlenga thawn chhuah theih tur market ngaihtuah chunga hma la turin a fuih a. Thawhhona tha tak hnuaia din Khuangleng Rural Haat enkawl chhunzawm leh venhim kawngah khawtlang mipuite chu neitu thinlung pu tlat turin a chah nghal bawk.

Pi H. Lalhmachhuani, DDM, NABARD chuan Khuangleng Rural Haat tha tak buatsaih a ni ta chu lawmawm a tih thu a sawi a. Thlai mai bakah, sa leh kutthemthiamna hmanga thil dehchhuahte zawrhna tur a nih thu sawiin, puitlin a nih theih nana Khuangleng VC leh khawtlang tawiawmnaah lawmthu a sawi bawk.

Thusawitu dang Pi R. Lalramhluni, DAO Champhai chuan NABARD sum cheng nuai 15 hmanga kuthnathawktute tana tangkai tak tur Rural Haat tha tak siam a ni chu lawmawm a tih thu a sawi a. Mizoram chhungah Champhai District chu tlangram lonei tam berna a nih thu tarlangin, nitin mamawh pung zelah tun aia nasa zawk leh taima zawka hnathawh a tul thu a sawi a. Kum tina hmun dang bawh zel lova hun rei zawk leh kum hlun zawka hmun ngaia lo neih a nih theih nan tunlai thiamna, hlo tur leh leitha hmangtea tanlak tum turin khawtlang mipuite a sawm nghal bawk.

Khuangleng Rural Haat hawnna puala hun hman hi Pu SC Ramnunmawia, District Co-ordinator, NEIDA chuan kaihruaiin Er. Samnuel Lalthazuala, Project Associate, NEIDA in Rural Haat sak dan a sawifiah a. Pu C. Lalremmawia, Chairman, Rural Haat Management Committee leh Pu TC Thangpuia, VCP Khuangleng te'n thu an sawi bawk a. Pu Kevin Laldinthara, Cluster Co-ordinator, NEIDA in lawmthu sawiin hun hman a khar a ni.

Khuangleng Rural Haat sak nan hian tunhma Bazar awmsa chu tih len niin a chung sak belha tihchangtlun a ni a. June, 2023 atanga sak tan niin March ni 28, 2024 ah zawhfel a ni. NABARD sum cheng nuai 15 hmanga sak niin, Implementing Agency NEIDA in Rs 75,000/- an tum bawk a. VC lamin a hmunhma ngaihtuahin tha leh zung an thawh bawk a ni.

Khuangleng Rural Haat hi zopa chhiara chhawng hnih niin, square feet 30 a lian a ni a, a chung leh hnuaiah hian Store Room leh Toilet tha tak dah a ni a. Bazar thutna seat 24, a hnuai leh chungah 12 ve ve a awm a, tui dah khawlna litre 2,000 dawng dah tel a ni bawk.

He huna tarlan a nih danin Khuangleng khuaah hian tun dinhmunah in 428 vel awmin mi 2,300 bawr an cheng mek a. Thlai an thar nasa a, bazar tha leh mumal taka kalpui an neih loh avangin theihtawp chhuaha hmalak niin NABARD kaltlangin Rural Haat din a ni ta a ni. A enkawl zui hna hi Rural Haat Management Committee kutah a awm dawn a ni.