Nimin khan Mamit leh Aizawl inkar kawngpui sial mek, National Highway 44A December 2019 chhunga zawhfel tum chu District Bawrhsap chuan an hnathawh mek dinhmun enin a tlawh.

National Highway 44A hnathawh mek hi an harsatna tawh leh hnathawh kalhmangte en niin PWD Highway Division I thuneitute'n thil nihphung chi hrang hrang an sawifiah a ni.

Mamit District Bawrhsap Pu Dr. Lalrozama I.A.S chuan harsatna awm sukiang tur leh chak zawka hnathawh a nih theihna tura tanho pawimawh a tih thu a sawi a. District thuneitute, hna enkawltute leh khawtlang hruaitute pawhin mahni theihna zawn theuha hmalakna kalpui tul a tih thu sawiin Mamit District mipui nghahhlelh em em kawngpui tha tak a awm thuai theihna tura thawhhopuiah mitinte a sawm a ni.

Pu Lalzawmthanga, Sr. EE PWD Highway Division I chuan National Highway 44A hnathawh mek chu Ministry of Road Transport & Highway (MoRTH) in December 2019-ah zawhfel vek tur a tih a ni a,  hemi hun chhung hian theihtawpchhuaha hna an thawh dawn thu leh Company lam pawh an nawr reng dawn thu a sawi.

Pu Zawma chuan he hnathawh mek hi 75% zawh fel tawh niin sum pawh hetiang ang vel tho hi hman ral a nih tawh thu a sawi a, hnathawh zawh theihna tur khawp sum a la awm thu sawiin, kawng hlui thawm thatna tur erawh ngaihtuahna hran hman a ngaih tur thu a sawi bawk.

Hnathawktu Company lamah harsatna a awm avangin an bungrua (khawl) hman mekte lak chhuah tuma hmalatu an awm tih sawiin heng hmanruate hi theih ang anga hum a nih theihna tura tan lak a tul thu a sawi a ni.

Tun dinhmunah Mamit leh Aizawl inkar NH 44A hnathawh mekah hian kawng laih tlang loh 4km vel zet la awm anga chhut a ni a, a hautak lai ber, Dampui hnuai Lung hmun hi 250m vela thui la awm in hei hian hun a la duh deuh dawn nia an hriat thu PWD Highway Divison I thuneitute chuan an sawi bawk.

Mamit District Bawrhsap hi Pu Zawmthanga Sr. EE PWD Highway Division leh thawktu dangte bakah Pu Paul Rokima, DIPRO Mamit, Joint VC Mamit hruaitute, Mamit Sub-Headquarters YMA hruaitute leh Mizoram Journalists’ Association, Mamit District member te'n an tawiawm a ni.