468/2024-2025

Champhai, the 13th May, 2024: Trained Nurses' Association of India (TNAI), Sub-Hqrs. Champhai buatsaih International Nurses Day lawmna hun General Nursing and Midwifery (GNM) School, Champhaia neih chu vawiin chawhnu dar 2:30 khan District Bawrhsap Pu James Lalrinchhana chuan khuallian niin a hmanpui. He hunah hian Dr. PC. Lalhmingliana, Sr. CMO Champhai leh Dr. Zatluanga, DMS, District Hospital Champhaite chu khualzahawm an ni.

Khuallian District Bawrhsap Pu James Lalrinchhana chuan Champhai District chhunga Nurse zawng zawngte chu an tana ni bik hman thin leh ngaihhlut hlawh tak International Nurses Day pual lawmpuina hlanin chibai a buk a. District Bawrhsap chuan International Nurses Day lawmna hunah tih danphung pangngai mai bakah hmasawnna tam tak a hmu chu lawmawm a tih thu sawiin, hmasawn zel tum turin a fuih a. International Nurses Day chu Nurse-te rawngbawlna hlu tak avanga lawmthu hrilhna leh hma an sawn zelna tura ngaihtuahna senna ni atana hman nise a duh thu a sawi a. Nurse-te chu chhel taka an rawngbawlna hlen tum tura chahin, anmahni pantute hmangaih taka enkawla rawng bawlsak turin a fuih nghal bawk.

Khuallian chuan Nurse-te hamthatna kan tih that poh leh khawtlangin hlawkna a neih belh ve zel dawn thu sawiin, kan ram sum leh pai dinhmun titha turin mipui kan hrisel a ngai a, hemi atan hian Nurse-te chu mi pawimawh tak an ni, a ti a. Health care sector tichangtlung tura ruhrel pawimawh tak an nih avangin tunhma zawng aiin Nurse-te kan ngaihhlut thiam a ngai a ni, a ti a. Nurse-te chu Doctor leh damlote inkara palai hna thawktu tangkai tak an nih thu sawiin, damlote damdawi ei dan tur, faina, ei leh in hrisel leh tul dangte tha taka hrilhfiah thin turin a fuih a. Tun aia Male Nurse nei tura tanlak a pawimawh thu sawiin, nursing care chu mipate thawh theih, hna zahawm tak a ni, a ti a. Champhai District-in GNM School a nei thar chu lawmawm tiin, batch hmasa ber zirlai 20 te chu theihtawp chhuah tur leh nakin zela zir leh turte tana entawntlak nih tum turin a fuih a. International Nurses Day chuan hriselna kawnga thawktute inkarah inpumkhatna tha zawk thlen se a duh thu a sawi bawk a. TNAI Sub-Hqrs. Champhai hnenah lawmpuina thilpek pawisafai Rs 10,000/- a hlan a, an kalzelna turah duhsakna a hlan nghal bawk.

Khualzahawm Dr. PC. Lalhmingliana, Sr. CMO Champhai chuan International Nurses Day pual hun hmannaa sawm a ni chu lawmawm tiin Nurse-te lawmpuina thu a sawi a. World Economic Forum 2023 in khawvela hna zahawm ber a puan zinga 6-na chu Nursing profession a nih thu sawiin, hna zahawm tak thawktu an nih avangin Nurse-te chu an nundante uluka zahawm taka hna thawk zel turin a fuih a. Midangte tana rawngbawltu pawimawh tak an nih tel avangin an hnathawh chu eizawnna mai nilo, malsawm rawngbawlna a ni tih hriaa tha taka hlen zel tum turin a chah bawk.

Khualzahawm Dr. Zatluanga, DMS, District Hospital Champhai chuan District Hospital chanchin thlangpui tarlangin, Civil Hospital Aizawl leh ZMC tih lohah nau nei tamna ber Hospital a nih thu sawiin, heng zawng zawngahte hian Nursing Staff-te hmalakna a chhuanawm hle a ni, a ti a. Engtik lai pawha damlo vil rengtu Nurse-te chu Hospital hmun nghaktu leh dinhmun pawimawh tak chelh an nih thu sawiin, Nursing Care that leh that loh an kutah a innghah tlat thu a sawi a. Nursing profession-a thawktute kalzelna turah duhsakna a hlan nghal bawk.

GNM School Champhai Principal Pi Lalengzami Fanai hnen atangin Florene Nightingale chanchin tlangpui ngaihthlak a ni a. International Nurses Day, 2024 thupui thlan 'Our Nurses, Our Future, The Economic Power of Care' tih chu sawifiahin, Nurse-te chu kan ram hmalam hun hriltu, hnam rohlu pawimawh tak, hriselna leh sum leh pai dinhmun chena siam tha theitu an nih dan a tarlang a. Nurse indaihloh dan tarlangin, WHO chhut danin mi 1000 zelah Nurse 3 awm tur a nih laiin tun dinhmunah khawvelah mi 1000 tan Nurse 1.7 zel awm anga chhut a ni, a ti a. Mizoramah Nurse 4807 leh Health Worker 1582, an vaiin 6389 an awm thu leh Champhaiah Nurse 210 vel awm tura chhut a nih laiin District Hospital-ah 50 vel an awm mek thu a sawi bawk.

He hunah hian Pi Vanlalhumi, Nursing Superintendent (Rtd.) in hunserh a hmang a. Nursing Staff leh GNM Zirlaite'n programme benglut tak tak an entir a. Nurse pension tawh mi 8 te chawimawina hun hman niin, Pi Vanlalhluni, Nursing Superintendent, District Hospital Champhaiin lawmthu sawiin hun hman hi a khar a ni.

Vawiin International Nurses Day lawmna hunah hian Champhai District chhunga Private Staff Nurse, Urban Primary Health Centre Staff Nurse, District Hospital Champhai Staff Nurse, Health & Wellness Officer, GNM School Staff leh Zirlaite, Nurse pension tawhte leh sawm bik dangte an tel a ni.

International Nurses Day hi May ni 12, 1820 a piang 'Lady with the lamp' tia hriat lar Modern Nursing tichhuaktu Florence Nightingale pianchamphaphak denchhenin kum tin May ni 12 ah lawm thin a ni a, kumin bikah chuan May ni 12 hi Pathianni a nih avangin a lawmna hun hi vawiinah buatsaih a ni. International Nurses Day hi kum 1965 ah hman tan niin, India ramah chuan kum 1974 atangin hman a ni.