467/2024-2025

Kolasib dated 13th May 2024: Vawiin khan Parish Hall, Kolasibah Women & Child Development Department hnuai a Sawrkar laipui atanga naupang tanpui ngai te tanpuina pek chungchang a hriattur pawimawh inzirtirna hun, 'Sensitization Programme for Sponsorship & Foster Care Beneficiaries' buatsaih a ni a. Pu Zaitinvawra, District Child Development Officer (DCPO) chuan he hun hi kaihhruaiin Pu John LT Sanga, Deputy Commissioner chuan a telpui a, tanpuina dawng tur thlan chhuah naupangte leh an nu leh pa te he hun ah hian an tel bawk a ni.

Pu John LT Sanga, Deputy Commissioner chuan Sponsorship & Foster Care hnuai a hamthatna awm te chu naupang ṭanpui ngai ten naupang dangte rual a hmasawnna an hmuh ve theih nana ruahman a nih angin a nihna tur tak ah chauh hmang turin hmaṭhatna dawngtu naupang nu leh pa te chu a chah a. Kawng hrang hrang a naupang dangte rual a hmasawnna an dawn vena tur a nih piah lam ah chhungkua leh khawtlang tan a mi ṭangkai an nih theihna hmanrua a hmang turin kalkhawmte a fuih bawk a ni.

Sponsorship & Foster care atan a sum lo kal te chu Juvennile Justice Care & Protection Act 2005 hnuai atanga lo kal a nih thu Pu Zaitinvawra chuan sawiin a hman dan tur te inhrilhfiahna hun a hmang a ni.

Sponsorship & Foster care hi naupang kum 18 hnuai lam, a duh apiang ten an dil thei a, dilna lut atangin tanpuina dawng awm naupang te chu an in ah kal chilh a zirchian an nih hnu ah District Level Selection Committee ten tanpuina dawng tur te chu kum khat atan an thlang chhuak thin a ni. Heng an thlan chhuah te hian thlatin Rs. 4000 dawngin, naupangin zirna school an kal theihna atan te, hriselna enkawl nan leh eitur ṭha leina atan te hman tur a ni a. An hman dan felfai tak a chhinchhiahna chu an thehlut leh thin tur a ni.

Kumin ah hian Kolasib district a naupang chhawmdawl ngai mi 119 hnen ah he sum hi thla 6 atan pek tawh a ni.