476/2022-2023
Kolasib dated 12th May 2022: Vawiin chawhma khan District Child Protection Committee, Kolasib district-te chuan Kolasib khaw chhunga kohhran enkawl Audrene Scism Children’s Home, Khuangpuilam leh Enna In, Vengthar te an tlawh a, thawktute nen inkawm hona hun hmangin Home dinhmun leh naupang enkawlna kalpui dan tlangpuite tarlan a ni.

Pu John LT Sanga, Deputy Commissioner, Chairman, DCPC chuan harsatna hrang hrang avangin Home-ah naupang enkawl an ngaih hian mi puitling, khawtlang tana mi tangkai ni tura enkawl a pawimawh thu a sawi a. Chumi tur chuan taksa hriselna tur a ei leh in tha bakah rilru hrisel tura inkaihhruaina tha neih a tul thu a sawi. Home enkawl hna chu hna hautak tak, inpekna pum hlum ngaihna hna a nih avangin thawktute chu fakawm a tih thu sawiin a hmun ngei a harsatna an neihte hmuhpui a hmalak dan tur sawipuina hun buatsaih a ni chu lawmawm a tih thu a sawi.

Heng Home tlawh a naupang enkawlte hi Child Welfare Committee-ten tehfung hrang hrang hmanga uluk tak a an ngaihtuah hnuah chuah dah luh thin an ni a, kum khat danah ennawn leh vek thin niin an dinhmun a zirin an awm chhunzawm theiin an haw tir thin bawk a ni. Evan. C.Vanlalruata, Home Superintendent tarlan danin Audrene Scism Children’s Home, Khuangpuilam hi 1993-a din a ni a, naupang kum 18 an tlin thleng a enkawlna hmun a ni a. Thawktu 13 awmin mipa naupang 8 leh hmeichhe naupang 22 an awm mek a, naupang 50 enkawl theih tur a ruahman a ni.

Capt. KH David Lalnunsanga, Home Superintendent tarlan danin naupang 25 enkawl theihna Enna In, Vengtharah hian thawktu 9 awmin naupang 12 an awm mek bawk. Home enkawlna tura a hunbi dik tak a sum a awm loh thin avanga harsatna an neihte thawktute chuan District Child Protection Committee hnenah an lo thlen a, tui indaih lohna leh ruah leh thli avanga kawlphetha a khaihlak chang a harsatna a awm thin thu sawi a ni bawk.

Vawiin Kolasib khaw chhung Home tlawhnaah hian Pu Vanlalfaka Ralte, SP, Dr. RK Lalthlamuana, SMO, Pi Cacy Malsawmtluangi Ralte, Judicial Magistrate, Dr. David Zaitinvawra, DCPO, DEO, President, MHIP leh YMA-te an tel bawk a ni.