Vawiin khan Lawngtlai District Child Protection Society (DCPS) chuan Lawngtlai College Veng-a LIKBK kohhran enkawl Motherless Home an tlawh a, an harsatna leh an mamawh te an thlir ho.

District Child Protection Society (DCPS) Chairman Pu J. Hmingthanmawia District Bawrhsap aiawhin Addl. DC Pu R. Lalsangluaia’n vawiin a Motherless Home tlawhtute hi a ho va, District Child Protection Officer, Mary Lalremruati, Sub-Headquarter MHIP President, Pi Vanlalhlupuiii, Central YLA President Pu Vanlianhrim leh District Education Office atangin Pu Laltanpuia te vawiin hian an tel a. Motherless Home ah hian a enkawltu kohhran Lairam Isua Krista Baptist Kohhran aiawhin Social Missions Coordinator Pi Rebecca Lalhmangaihzuali leh home a thawk ten an lo dawng a ni.

Addl. DC Pu R. Lalsangluaia chuan Lawngtlai ah Motherless Home kan neihchhun LIKBK Motherless Home chu hunbi nei a regular taka an tlawh thin thu a tarlang a, chutih rualin DCPS angin a khat tawk in tlawh thin a ni bawk a, vawiin ah pawh hian chutiang hun chu neih a nih thu a tarlang a, a enkawltu LIKBK kohhran inpekna chu fakin a thawktu ten fai leh thianghlim taka Home an chul hnum reng chu entawn tlak hle a a hriat thu a tarlang bawk.

Home enkawltute hian an hmunhma Motor luh theihna tura siam an mamawh thu te, Backward Region Grant Fund atanga sak mek Adoption Center chu sak zawh thuai a tul thu DCPS memberte hi an lo hrilh a ni.

LIKBK Motherless Home ah hian Home Supervisor 1 leh thawktu dang mi 11 an awm a. Tunah hian naupang 15 an nei mek a ni.