Ni 27th September, 2014 (Inrinni) khan SBI Lead bank office huahawtin Sub-Hqrs. YMA Hall, Venglai-ah ‘Mega Camp on PM Jan Dhan Yojana Programe’ neih a ni a, Lunglei DC Pu Ashish Madhaorao More, IAS chu Khuallian niin Bank Account thar neite hnenah Pass Book a sem nghal a ni.

PMJDY Mega camp hawnna Pu James LH pachuau, CM Lead Bak, Lunglei kaihhruaiah Khuallian DC Pu Ashish More chuan thu sawiin kum zabi 21-na a herhchhuah dawn khan India ramchhung state 29 leh UT 7-ah mihring vaibechhe 100 kan ni a, India rama chhungkaw tin ten Bank Account 1 tal nei hman tura hmalak ni mahse kan hlawhtling thei ta lova; tun dinhmunah hian mihring vaibelchhe 125 vel kan tling tawh nain theihtawp kan chhuah chuan India rama chhungkaw tin ten Bank Account an nei ngei thei ang, a ti. PMJDY chu chhungkaw tin huap zo scheme, mipuite hausakna tinzawn a nih avangin a hming ringawt pawh hi a ropui hle a ni, a ti. India ramah vote thlak tan theih kum chu kum 18 a nih laiin PMJDY avangin kum 10 atangin Bank Account a hawn thei tawh a ni, a ti. Bank ten khawpui pawnah tun aia ta Branch leh ATM te hawng thei se, mipuite pawhin an tangkaipui hle a rin thu a sawi a. NREGA hnuaia beneficiary ten Bank Account kaltlang veka hlawh la tu a nih laiin hmun thenkhatah a sumfaiin an la dawng chu tha a tih lo thu leh sorkar hnuaia MR emaw Contract basis-a thawk emaw zawng zawngte pawhin Bank Account hawng vek se a duh thu sawiin Lunglei District-ah chuan hemi chungchangah hian hmalak a tum thu a sawi bawk. Sorkar hmalakna hrang hrangah tlawmngai pawl ten theihtawp an chhuahui thin leh an thlawp thin avangin hmasawnna pawh a kal chak hle nia a hriat thu DC Pu More chuan a sawi bawk.

Mega Camp hawnnah hian Pu Henry Hrahsel, Manager, PBD, SBI Lunglei Branch chuan PMJDY chungchang sawizauna a nei nghal a. SBI bakah Bank dang zawng zawngte tel kimin a duh apiang tan Bank Account thar hawn theihna hun hman zui a ni.