No.4009/2020-2021

Dated Champhai, the 11th August, 2020: Champhai Bawrhsap Pi Maria C.T Zuali, Chairman, District Child Protection Committee nibawk hmalaknain vawiin August Ni 11 atang hian District Child Protection Unit (DCPU) leh Disaster management & Rehabilitation (DM&R) Champhai tangkawp chuan Tuipuirala lirnghing tuarna zual khaw 10 a naupangte chungchang zirchiang tur leh an dinhmun ngaihven turin Team 4 a insiamin an feh chhuak.

Heng team te hian an tlawhna khua Village Level Disaster Management Committee te meting neihpuiin, an khawtlanga naupangte dinhmun sawi ho a ni a. Naupang harsatna tawk zual bikte an inah tlawh chhuakin, an harsatna tawh dante zirchianna an nei zui bawk a. Nu leh pa leh chhungte hnenah naupang enkawl dan leh venhim dante hrilh hriat an ni bawk. DCPU te hian khawtlang hruaitute leh nu leh pa te hnenah khuarel chhiatna tuar naupangte hi 'The Juvenile Justice (Care & Protection of Children) Act' in naupang enkawl ngai leh venhim ngai bik a tih an nih avangin, hun harsa leh khirh tawh lai tak a ni tih hre reng a, uluk zawk leh fimkhur taka venhim ngai an nih thu uar taka sawiin, naupang him theih zawkna turte an hrilh a ni. A bik takin heng hursualna, ruihhlo hmansual leh naupang chunga hleilenna hrang hrang te hi thleng palh thei reng a nih avangin, khawtlang hruaitute leh nu leh pa te pawhin naupangte an enkawlna kawnga an mawhphurhna hlen chhuak tura tan la leh zual turin an fuih bawk.

He hunah hian hmalak dan turte leh tanho dan turte sawihona neih zel a ni a. Report dawn danin lirnghing avanga naupang chiai pakua (9) report dawn a ni. Vawiin hian Sesih, Sazep, Lianpui, Khuangthing, Bungzung, Dungtlang leh Samthang khuate tlawh niin, naktuk lamah khaw dangte tlawh chhunzawm leh tum a ni.