No.4010/2020-2021

Aizawl, the 11th August 2020 : Vawiin khan Labour, Employment, Skill Development & Entrepreneurship Department enkawltu Minister, School Education changtu ni bawk Pu Lalchhandama Ralte chuan Planning & Programme Implementation Department Conference Hall-ah Mizo thalaite zinga Entrepreneurship tehfung zirchianna ‘Mapping of General Enterprising Tendency Among Mizo Youth’ tih chu a tlangzarh a, he zirchianna sawihona hun buatsaih pawh a hmanpui nghal a ni.

Pu Lalchhandama Ralte chuan he zirchianna hi Mizoram hmasawnna rahbi atan tehfung pawimawh a ni thei a, a bik takin zirna policy thar NEP hnuaia ruahmanna siam zel turah pawh a tangkai thei dawn tih sawiin Planning Department in hmathlir thui tak neia he zirchianna an buatsaih avangin lawmthu a sawi. He zirchianna atanga Mizo thalaite GET score 30.37 lo lang chuan Mizote hi entrepreneurship lamah theihna kan nei sang a ni tih a tichiang a, Pathianin talent min pek hi he zirchiannaah hian a langin ka hria, a ti.

Minister chuan Sawrkarin entrepreneurship lamah hma a lakna a la rei lova, nikuma India Today “state of the States” Report ah leh Economic Survey of India thar berah entrepreneurship lama hma la tha te zingah Mizoram kan tel te kha a ropui a, hmasawnna kan nei chho mek hi a lawmawm hle a ni, a ti. Zirna kalphung thar NEP ah zirlai naupangte chu pawl hniam atangin an tuina lam zirtir an nih dawn avangin GET zirchianna hian hemi atana ruahmanna siam kawngah pawh nasa takin a pui thei dawn a, School Education Department tan pawh thil tangkai tak a nih a rinawm tih a sawi.

Report tlangzarhna leh sawihona hi Dr. C. Vanlalramsanga, Secretary, Planning and Programme Implementation Department chuan a kaihruai a. GET zirchianna hi state dang ten an la tih ve mang loh avangin state dangte nena inkhaikhin a theih rih lova, mahse khawvel ram dangin an lo tih tawhna te thlirin Mizoram dinhmun chu a tha hle niin zirchianna hian a tarlang tih a sawi.

He zirchianna buaipuitu ber Dr. Laldinliana Varte, Director, Mizoram University Incubation Centre leh Principal Investigator ni bawk leh Pi K.C. Malsawmtluangi, Research Associate te chuan sumdawng leh entrepreneur danglamna te, GET tehfung hrang hrang sawifiahna te leh an zirchianna atanga an thil hmuhchhuah leh zirchhuah te an sawi a. Hemi zawh hian Commissioner & Secretary, School Education Department; Special Secretary, LESDE Department; Director School Education Department; Director, LESDE Department; Director, Economics & Statistics Department leh Director, SCERT te chuan zau takin an ngaihdan leh GET tangkai theih dan te an sawi a ni.

Planning & Programme Implementation Department hnuaia Entrepreneurship Development Centre leh Mizoram University Incubation Centre te tangkawpin ‘Mapping of General Enterprising Tendency Among Mizo Youths’ hi an buaipui a ni.

Mizoram District hrang hranga zirlai naupang 2255 (Higher Secondary zirlai 1240 leh college zirlai 1015) te chu sample size a la in zirchianna hi kalpui a ni a. Heng zinga za zela 48.2 chu mipa niin za zela 51.8 chu hmeichhia an ni a. Za zela 61 chu arts zirlai niin za zela 18.6 chu science zirlai leh za zela 20.4 chu commerce zirlai an ni a. He zirchianna hi District thar awm hmaa tan anih avangin District 8 angin an thil hmuchhuah te hi tarlan a ni a. Sample size atanga za zela 33.3 chu Aizawl District zirlai niin za zela 11 chu Champhai District, za zela 12.2 chu Lunglei District, za zela 8.9 chu Kolasib District, za zela 10 chu Serchhip District, za zela 6.7 chu Lawngtlai District leh za zela 7 chu Siaha District zirlai naupangte an ni.

Mipa te mean enterprising tendency score chu 30.7010 ni a hmuhchhuah niin hmeichhia te score chu 30.0497 a ni a, chawhrualin Mizo thalai te mean enterprising tendency score chu 30.37 a ni a. China thalai te score hi 33.3 a ni a, USA hi 31.9223, Malaysia hi 25.6 a ni a leh Slovakia chu 32.99 a ni. Ram dang score te nen khaikhinin Mizo thalaite score hi a tha hle niin zirchiangtute hian an sawi a ni.

District zawng zawng zingah Aizawl District-a zirlai te chu mean score sang ber nei an ni a. Zirchianna atangin science zirlai te mean score chu arts leh commerce zirlai te aiin a sang zawk tih te, college zirlai te aiin higher secondary zirlai te chuan mean score an nei sang zawk tih te pawh hmuhchhuah a ni.