No.2712/2021-2022
Aizawl dated 25th October 2021: District Co-ordination Committee on National Deworming Day, Kolasib District chuan vawiin chawhma khan Chief Medical Officer pisaah thutkhawmna neiin kumin chhung a National Deworming Day thawhhninna hawnna hun an hmang a. NDD thawhhnihna kalpui chhung hian Kolasib district chhung a naupang kum 1- 19 inkar 33,086 hnenah rulhuthlo pek tum a ni.

Hun kaihruaitu Dr.Lalhlimpuia, CMO chuan naupang hrisel tak a an than lenna tur chuan an taksa mamawh hrang hrang a nihna tur ang tak a an dawn thin a pawimawh thu a sawi a. Rulhut pai avanga taksa leh rilru thleng a harsatna a thlen theih avangin rulhuthlo ei ngaih pawimawh a tul thu a sawi. NDD kalpui tawhnaah CMO chuan a thawhpui District Education Office, Women & Child Development, Kolasib district leh PHE department-a thawktute hnenah lawmthu sawiin NDD 2021 thawhhnihna hlawhtling tak a kalpui a nih theih nan thawhhopui ah a sawm nawn leh bawk a ni.

Dr.Lalhlimpuia chuan hrileng avanga school-te khar rih a nih avangin NDD hnuai a hmalakna hi ASHA kaltlangin in tin a kalin naupang kum 1-19 inkarte rulhuthlo pek hna kalpui a nih tur thu a sawi a, ASHA-te hi Covid-19 vaccine la kim tawh vek an nih thu a sawi bawk a ni.

Dr.R.K.Lalthlamuana, Senior Medical Officer chuan National Deworming Day kalpui tawh dan tlangpui tarlanna hun hmangin February 2021-a NDD thawhkhatna buatsaih ah khan naupang kum 1-19 inkar 30,859 hnen ah rulhuthlo pek a nih thu a sawi a, hei hi pek tur zat bituk atangin za zelah 99.59 ang a chhut a ni.

Vawiin atanga ni 30 October 2021 thlenga kalpui tur NDD thawhhnihnaah hian kum 1-19 inkar naupang 33,086-te hnen ah ruihuthlo pek hman tum a ni a, Kolasib district chhunga Accredited Social Health Activist (ASHA) 87 kaltlangin damdawi hi pek chhuah a ni dawn a ni.