1209/2022-2023
Kolasib dated 11th July 2022: Vawiin chawhma kha DC Conference Hall, Kolasibah District Consultative Committee/ District Level Review Committee-te chuan thutkhawmna an nei a. Pu John LT Sanga, Deputy Commissioner, Kolasib chuan he thutkhawmna hi kaihruaiin Kolasib district chhunga Bank hrang hrangte leh Sawrkar departemt hotute an tel a ni. Pi Lallawmkimi, Lead Bank Manager, Kolasib district tarlan danin tun thla thum chhunga Credit Deposit Ratio (CD Ratio – Bank in Deposit a dawn atanga loan a pekchhuah zat) chu 68.69% a nih thu leh thla thum liamta hmasa nena khaikhinin za zelah 12-in a pung tih a sawi.

Pu John LT Sanga chuan District Consultative Committee/ District Level Review Committee-a member-te chu Kolasib district mipuite eizawnna leh khawsak dinhmun chawikan kawnga hna pawimawh tak chelhtu an ni tih hre turin leh sawrkar hnuai a hmathatna hrang hrang tihpuitlin kawnga hmanraw pawimawh tak an nih thu a sawi a. Bank kaltlangin Sawrkar chuan mipui tan a hamthatna a ruahman thinte chu a chhawrtu tur mipuite hnen a thlen ngei theihna turin zirtirna leh inhrilhhriatna uar zawk a kalpui a pawimawh thu Deputy Commissioner, Kolasib chuan a sawi.

Kolasib district chhunga India Post Payments Bank emaw Business Correspondent kaltlanga Bank la dawr thei lo khaw thenkhat awmte zingah Dilzau leh Sethawn tan ruahmanna a awm tawh thu leh khaw dang pawh khawl hmanga thlunzawmna tihfel a nih chuan Bank nena indawrna kawng awlsam zawk a awm thuai beisei a nih thu tarlan a ni a. Ran vulh, sangha khawi leh lo neih kawnga hma la duh, loan mamawh te chu a changtu Department leh Bank hotute nen enho a, awlsam zawk a loan an hmuh theih dan ngaihtuah nise tih rel a ni a. Khawtlang tih hmasawn nana pawimawh tak, eizawnna ngelnghet nei tur a nuho intelkhawm, Self Help Group-te pawhin an mamawh ang loan an hmuh theih nan a changtu department leh Bank hotuten thawhhona tha zawk neih a pawimawh thu sawi a ni.

Vawiin thutkhawmnaah hian Bank venhima kawnga Police nena thawhhona kalpui dan leh Potential Linked Credit Plan, 2023-24 chungchang sawina hun neih a ni bawk a ni.