1208/2022-2023
Aizawl, 11th July, 2022 : Dr R. Lalthangliana, Health & Family Welfare, Commerce & Industries, Higher & Technical Education changtu Minister chuan inrinni tlai khan Guwahati atanga Shillong panin inrinnni zan khan North East Centre for Technology Application and Reach (NECTAR), National Medical Commission (NMC) leh North Eastern Indira Gandhi Regional Institute of Health and Medical Sciences (NEIGRIHMS) hotute a kawm.

Dr Thangtea hian Mizoram House, Shillong-ah North East Centre for Technology Application and Reach (NECTAR) hotu pawimawhte kawmin NECTAR hnuaia scheme hrang hrangte a sawipui a, heng scheme kaltlanga Mizoram tana hmalak theihna tur awmte sawiho niin, NECTAR hotute chuan Mizoram nen tangduna a tul anga hmalak chhunzawm zel an inhuam thu an lo sawipui a ni.

NECTAR hi autonomous society niin, Department of Science & Technology, Government of India hnuaia awm an ni a, Shillong, Meghalaya-ah headquarter an nei a, ni. NECTAR hi India hmarchhak state pasarihte tana din a ni a, tunlai thiamna (technology) thar ber ber hmang tangkai chunga hmasawnna kawng sial hi an hna ber niin, a bik takin Agro & Food Processing, Renewable energy, Bamboo Applications, Geo Spatial Applications, Employment & Livelihood Generation leh Communication-ah an inthlurbing deuh a ni.

Hemi hnu hian Dr Aruna V. Vanikar, President (UG) Medical Education Board, National Medical Commission (NMC) leh Dr Nalin Mehta, Director, NEIGRIHMS, Shillong te nen inkawm lehin Zoram Medical College hmasawnna leh tihchangtlun dan turte an sawiho a, NEIGHRIMS leh ZMC thawhho dan turte bakah ZMC than zelna tura hmalak ngaite an sawiho a ni.

Dr Thangtea hian nimin khan Guwahati let lehin President, YMCA North East India Region (YMCA-NEIR) a nihna angin YMCA-NEIR hotute nen Assam Chief Minister Dr Himanta Biswa Sarma chu a chenna inah an hmu a, YMCA-NEIR tan Guwahati ah ram pe turin an thlen a ni.