3846/2023-2024

16th February, 2024 : Champhai District huamchhunga Cooperative Society-te hmasawnna tur ngaihtuahin Champhai District Cooperative Development Committee (DCDC) chu nimin khan an Chairman Champhai DC Pu James Lalrinchhana hovin an thukhawm.

Pu James Lalrinchhana chuan Champhai District Cooperative Development Committee (DCDC) chu District huamchhunga cooperative movement ti hmasawn tura mawhpurhna fawng chelhtu anih angin member tin ten theihtawp an chhuah a tul thu leh, a theih apiangah Department-te tang tlanga convergence-a hna kalpui thin a tul thu a sawi a. India ram hmun hrang hrangah Cooperative movement kaltlangin hmasawnna tam tak hmuh anih tawh thu leh Mizoram leh Champhai District-ah pawh kan economy tih hmasawnna kawngah leh mi harsa zawkte dawm chhuahna kawnga hmanraw pawimawh tak ala nih ngei a beisei thu a sawi a ni.

Meeting-ah hian District Cooperative Officer & Convener DCDC Pu B. Lalchhanhima chuan DCDC thiltumte ede leh Champhai District huamchhunga Cooperative Society dinhmun tlangpui te a tarlang a.

District Cooperative Office, Champhai ah hian tun dinhmunah Champhai District leh Khawzawl District te bakah Ngopa RD Block chhungah Cooperative Society 216, Large Area Multipurpose Societies (LAMPS) pakhat leh District Level Cooperative Society pahnih in register an awm mek ani.

Thutkhawmah hian Cooperative Society dinhmun tlangpui te leh hmalak tul te sawiho a ni a. Damdawi hrang hrang man man zawka hralh chhuahna Sawrkar Laipui scheme Pradhan Mantri Jan-Aushadhi Yojana pawh Champhai District ah din ngei anih theihnan hmalak nghal ni se tih DCDC chuan a rel a. Ran vulh a bik takin bawng vulh leh sangha khawi (Dairy & Fishery) lama District chhunga Cooperative hnuai hmalak theihte leh Bank-te nena tanrual theih dan te zirchian nghal ni bawk se tih Committee chuan a rel bawk a.

Champhai District Milk Producers’ Co-operative Union Limited (CHAMUL) chungchang pawh vawiin meeting-ah hian uluk taka ngaihtuah ho niin Chamul hi kalpui chhunzawm zel anih theih nan leh a tul leh pawimawh te lo bawhzui turin Pu. B Lalchhanhima District Cooperative Officer leh Dr Lallawmsanga Tlau, District AH&Vety Officer-te Committee chuan a ruat ani.

District Cooperative Development Committee thutkhawmah hian Sawrkar Department hrang hrangte, District Development Manager (DDM) NABARD leh Lead Bank Manager te an tel a ni.