District a sorkar laipui scheme hnuaia hmalak dan zir a enfiahtu District Co-ordination & Monitoring Committee, Kolasib (DISHA) chu an chairman Pu C.L Ruala, MP Lok Sabha hovin Kolasib DC Conference Hall-ah vawiin khan an thukhawm.

Meeting-ah hian Pu C.L Ruala chuan Kolasib district-ah sorkar laipui scheme hnuaia beneficiary thlan felfai taka kalpui a ni thin chu entawntlak atih thu sawiin, district dang entawn turin hma la zel turin a chah a. District official te sorkar kutke tak tak kan ni tih in hria a, thahnemngai taka hmala zel turin a chah a ni. Committee co-chairman Pu Ronald Sapa Tlau, MP Rajya Sabha pawhin thu a sawi a, district a sorkar hnathawkte sorkar scheme hrang hrang a taka kalpuitu in ni a tiin, tha thlah lova kalpui zel turin a chah a ni.

Vawiin meetingah hian Kolasib District chhunga sorkar laipui scheme kalpui dan leh hmalak mek dan te thlirho a ni a. District chhunga hmalak dan tlangpui te:

National Rural Drinking Water Programme(NRDWP) hnuaiah kum 2015-16 chhungin khaw 40ah hmalak a ni a. Non Lapsable Central Pool of Resources (NLCPR) hnuaia Rs.780.47lacs senga sak Bilkhawthlir(Pumping) Water Supply Scheme chu 9th December, 2016 khan hawn niin, In 358 leh public point 22 ah pekchhuah a ni. Kolasib WATSON Division in kum 2015-16 chhunga tui bill atanga a chhiah a lakluh zat chu Rs.32 lacs a ni.

Swachh Bharat Mission(Gramin) hnuaiah daileng a inthiar awmloh nan theihtawp chhuah a ni a, khaw 21 a ekin neilo chhungkaw 641te ekin sak sak an ni tawh a. District chhungah dailenga inthiar awmtawhlo a ngaih theih a ni tawh a. Khaw 32 a ekin thianghlim tawklo in 1225 te tan ekin thianghlim sakna tur buaipui mek a ni.

Swachh Bharat Mission(Urban) hnuaiah bawlhlawh sawngbawlna (Solid Waste Management) tur Dihmun Tlangah sak mek a ni. Khawpuiah hian dailenga inthiar an awm hriat a nilo a, ekin thianghlim tawklo te sakthat a ni.

National Social Assistance Programme (NSAP) hnuaiah Indira Gandhi National Old Age Pension Scheme a kum 80 chunglam 1091 leh kum 60-79 inkar 263 hnenah sem a ni a. National Family Benefit Scheme hnuaiah mi 15 hnenah Rs.20,000/- pek tura ruahman mek a ni.

Sarva Siksha Abhiyan hnuaiah kum 2016-17 chhungin naupang school lutlo 495 hnenah Special courses ah zirtirna Non Residential Special Training Centre Phaisen, Saiphai, Pangbalkawn ah leh Residential Special Training Center, Diakkawn,Kolasib ah te pek an ni. School 15 thuamthat hna kalpui mek a ni a. Mid Day Meal hi naupang 12659 hnenah pek thin a ni a. Chaw chhun chhumna tur in te Upper Primary School pathumah sak a ni bawk.

National Health Mission hnuaia October 2016 atangin tun thlengin nau nei 321 awmin naute 317 damin an piang chhuak a, heng zingah hian damdawiin nilo hmundanga piang 21 an awm a ni. Damdawiina nau nei hnena tanpuina pek thin Janani Suraksha Yojana(JSY) hnuaiah nu 270 hnenah pek a ni. Rashtriya Bal Swasthia Karyakram(RBSK) hnuaiah school 30 leh anganwadi 37 tlawh niin, zirlai naupang te hriselna endik thin a ni a. National Programme for Prevention and Control of Cancer, Diabetes, Cardiovascular Disease and Stroke (NPCDCS) hnuaiah a thlawna in entirna vawi 7 huaihawt niin, mi 2017 en an ni.

Mahatma Gandhi National Rural Employment Guarantee Scheme(MGNREGS) hnuaiah job card nung mi 18293 in an nei a. Kum kallai mekah ni 17 inhlawhna pek tawh a ni a. Integrated Water Development Project (IWDP) hnuaia project 5 leh Integrated Water Management Project (IWMP) hnuaiah project 6 kalpui a ni a. IWDP hnuaia project 2 chu zawh tawh a ni a, project 3 dang zawh hnaih a ni bawk. Rs.84.38lacs kum kallai mekah hian sen ral tawh a ni.

Meeting-ah hian Serlui bialtu MLA Pu K.Lalrinthanga, Parliamentary Secretary a tel bawk a. Vawiin DISHA meeting hi kum 2016-17 atan hian a hnuhnung ber a ni.