Lunglei DC Pu K. Lalrohlua kaihhruaiin vawiin chawhma khan a pisaah Lunglei khawpui tana City Level Executive Committee on Deendayal Antyodaya Yojana – National Urban Livelihood Mission (DAY-NULM) an thukhawm a, he Mission hnuaia hmalak tawh te thlirho in, an hmachhawp thenkhat te sawihona an nei bawk.

Pu K. Lalrohlua chuan sawrkar laipuia hmalakna te hi internet behchhan deuh vek a kalpui a ni tawh tiin, sawrkar hnathawk te pawh kan in update ve zel a tul a ni, a ti. Department hnathawhte mipui hmuh theih a pholan a la nih chhoh zel dawn avangin tunlai technology milin engtinnge hna kan siam ang tih ngaihtuahna kan sen a ngai a ni, a ti a. Central scheme hnuaia kan hnathawh te pawh sawrkar laipuia tarlan tlak turin kan siam chhoh tan a ngai a ni, a ti bawk.

Meeting-ah hian Lunglei DUDO leh Member-Secretary ni bawk Pu Andrew Lalhruaia chuan NULM hnuaia Lunglei Town Area chhunga an hmalakna report a pe a. NULM component paruk zinga Social Mobilisation & Institutional Development (SM & ID) hnuaiah Self Help Group (SHG) 109 an enkawl mek tiin, Support to Urban Street Vendors (SUSV) hnuaiah vending zone, restricted vending zone leh no vending zone turte an enfiah vek tawh thu a tarlang a. Self-Employment Programme (SEP) hnuaiah mi 5 hnenah mimal loan pek niin, Employment through Skill Training & Placement (ST&P) hnuaiah mi 219 hnenah thiam thil (skill) training, Phase 2 kalpui leh mek a nih thu a tarlang a ni.

Heng bakah hian Committee chuan Lunglei khawpui chhunga Home awm te survey tha leh turin rem a ti a. Hnahthial leh Tlabung-a DAY-NULM kalpui tura ruahmanna, Social Mobilisation Plan for Hnathial Town leh Social Mobilisation Plan for Tlabung Town te chu a pawmpui nghal a ni. Hnanthial leh Tlabung ah te hian DAY-NULM hnuaia component paruk (6) zing atangin component pathum (3) - Social Mobilisation & Institutional Development (SM & ID), Employment through Skill Training & Placement (ST&P) leh Shelter for Urban Homeless (SUV) te chauh kalpui a ni thung ang.