Vawiin khan Rural Development Minister, Pu R.Lalzirliana chuan All Mizoram DRDA Employees Association (AMDEA) General Body Meeting vawi-1 na Synod Conferene Hall-ah a hmanpui.

Pu R.Lalzirliana chuan RD Dept. chu mirethei zawkte leh kuthnathawktu te ngheng hnai ber an ni tiin, department hnuaia thawktu te chu thahnem ngai taka thawk turin leh dawhkan a hnathawh mai piah lamah, a hmun kalchilha hna thawk turin a chah a. RD Minister chuan member te chu mahni nihna diktak leh dinhmun hrechiang turin leh aia chung zawkte zah der thiama, tawngkam hawihhawm hmang hram hram turin a chah a. Pu Zira chuan sawrkar hnathawk te chu an tanghma chauh ngai lo turin leh an thawh chhan hria a, zir thiamna leh finna an neih te chu hmang tangkai turin a chah bawk a ni. Mihring nun danglam chho zelah insiamrem a tul thu sawiin, fimkhur zawka hnathawh a ngai a ni, Minister chuan a ti. Kalkhawmte chu huaisenna, dikna leh Pathian tihna nena ram rawngbawl turin a sawm nghal bawk a ni.

He hunah hian Pu P.C Lallawmkima, AMDEA President pawhin thu sawiin, an pawl member te chu neitu rilru pu chunga thingtlang mite tana theihtawp chhuaha hna thawk theuh turin a chah a. Inpawhtaka sawrkar nena an thawhdun naah lawmthu a sawi bawk.

All Mizoram DRDA Employees Association (AMDEA), General Body Meeting hi Pu P.C Lallawmkima, President in a kaihruaia, Pi R. Laltanpuii, Secretary hnen atangin report ngaihthlak a ni a. He hunah hian member boralta te sunna hun hman a ni a, chawhnu lamah rorelna neiin hruaitu thar thlanna hun hman nghal a ni.