Vawiin chawhma khan Lok Sabha MP Pu C.L.Ruala (Chairman) leh Rajya Sabha MP Pu Ronald Sapa Tlau (Co-Chairman) hovin Aizawl District Development Coordination & Monitoring Committee (DISHA) meeting chu New Secretariat Conference Hall-ah neih a ni.
Vawiin Disha meeting hi kumin sawrkar kum chhunga a vawikhatna niin a hnuhnung ber chu February Ni 23, 2018 khan neih a ni a. Chairman Lok Sabha MP Pu CL Ruala chuan kum khatah vawi 4 meeting neih thin tur a nih thu sawiin Mizoram chu India ram state zinga DISHA meeting nei zing pawl a nih thu a sawi a. Meeting-ah hian Department hrang hrang hnathawh leh hmachhawpte, hnathawhna kawnga harsatna thlengin sawiho a ni.
Aizawl District-ah hian MGNREGA hnuaiah nuai 809.67 hmuh niin job card neitu mi 26885 an awm mek a. Aizawl District hi MGNREGA Annual Award 2018 dawng tura thlan atan rawt (nominated) niin result hriat a la ni lo. Pradhan Mantri Awaas Yojana-Gramin (PMAY-G) hnuaiah in 158 (2018-2019) sak a ni a. Shyama Prasad Mukherjee Rurban Mission (SPMRM) scheme-ah hian nuai 181.074 awmin nuai 78.99 hman a ni tawh a, hemi scheme hi Aibawk leh Thingsulthliah-ah kalpui mek a ni. Integrated Child Development Services (ICDS)-ah hian nuai 940.09 hman niin Social Welfare Department-in he scheme hi a kalpui a. Ashram Schools & Construction of Hostels hi Social Welfare Department kalpui tho niin Zembawk KVI Complex, Mualpui, Durtlang SWD Complex, Lungleng leh Kolasib-ah hostel sak hna thawh a ni.
Swachh Bharat Mission (Urban) atan nuai 2091.10 atangin nuai 1153 hnathawh nan hman a ni tawh a, vantlang leh mimal hman tur inthiarna siam niin UD&PA chuan he hna hi a kalpui a. PMAY-urban atan nuai 1041.99 awmin nuai 975.78 hman a ni tawh. Sarva Shiksha Abhiyan (SSA) hnuaiah a thlawnin text book Primary School-ah 12805 leh Middle School-ah 9299 sem a ni a. Uniform a thlawnin zirlai 19672 hnenah sem a ni. Mid Day Meal Scheme hnuaiah hian primary school 282 leh middle school 236 ah kalpui a ni.
DISHA meeting-ah hian Aizawl District chhunga MLA – Home/RD Minister Pu R. Lalzirliana, Finance/Planning/Law Minister Pu Lalsawta, Dy. Speaker Pu R. Lalrinawma, Lt. Col. ZS Zuala, Dr. Ngurdingliana, Pu R.L.Pinmawia, Pu Vanlalzawma, Pu K.Sangthuama leh Er. Lalrinawma te, Member Secretary Aizawl DC Dr. A. Muthamma leh sawrkar department hotu te, AMC Mayor Pu PC Lalhmingthanga leh Village Council member te an tel a ni.
