No.1874/2021-2022

Champhai, 16th August, 2021: Vawiin chawhma khan Myanmar ramri kaltlanga nitin mamawh ei leh in lakluh chungchang relin District Disaster Management Authority chu Bawrhsap Pi Maria C.T Zuali hovin DC Conference Hall-ah an thukhawm.

He hun kaihruaitu Pi Maria C.T Zuali chuan International border-te chu Central sawrkar enkawl niin sawrkar laipui kutah a awm thu leh, hemi kaltlanga hmalaknate an mawhphurhna a nih thu a sawi a. Nitin mamawh ei leh in tur lakluh kawngah ngaihtuahna fim tak sen a tul thu sawiin, kalkhawmte chu ngaihdan tlang tak neia District kalzel dan tur ngaihtuah chunga infinchhuahpuiah a sawm a ni.

Thukhawm chuan Champhai District-ah Covid-19 hri lengin kiam lam aia pun lam a pan rih avangin fimkhur zual a tul zual hlein a hria a. He hunah hian Health Department hotute atangin hrikai dan kimchang, Covid-19 vei enkawl leh vaccine pekchhuah dante ngaihthlak a ni a. DDMA member leh sawm bikte hnen atangin Myanmar ramri kaltlanga nitin mamawh ei leh in lakluh chungchanga ngaihdan leh thurawnte ngaihthlak niin zau taka sawiho a ni a. Tual chhung thar thlai leh chawhmeh tam hun lai a nih vang leh Mizoramah nitin mamawh ei leh bar leh tul dangte a luh that avangin tun dinhmunah ramri kaltlanga nitin mamawh eichawp lakluh chu hri leng mek dinhmun thlirin insum rih nise tih a ni. Vegetables Supply Chain kaltlangin mamawhte ngaihtuah zel nise tha tih a ni a, ei leh bar chungchanga harsatna awm theite DDMA in thlithlaiin a tul chuan hma lak zel nise tih a ni bawk.

CMO Champhai Dr. R.Lianmawia chuan hrikai hmuhchhuah chu a kar tela a tam zual thu tarlangin, August thlaah ringawt pawh case engemawzat a awm belh thu leh, ramri dep khua Zokhawtharah case a tam zual thu a sawi a. Covid-19 vaccine first dose la za zela 70 an tlin tawh thu sawiin, second dose la erawh dose lak inkarin hun a duh deuh avangin a tam rih lo a ni, a ti bawk.

DMS Champhai Dr. Zatluanga tarlan danin District Hospital Champhaia inentir leh lut tur endik zinga kumin June ni 21 atanga August ni 13 thleng khan Rapid Antigen Test positive percentage chu za zela 0.9 niin, August thla bika test postive percentage chu za zela 2.1 a ni. TrueNat bikah nikum September atanga kumin August ni 13 thla thlenga test positive percentage chu za zela 8.8 niin, August thla bika test positive percentage zat chu za zela 14.9 a ni thung. Natna lang chhuak nasa leh enkawl zual ngai bik enkawlna hmun Dedicated Covid-19 Health Centre (DCHC) District Hospital Champhai khum 20 awmnaah damlo mi 15 an awm mek a ni.

He hunah hian DDMA Member-te bakah sawmbik official, Assam Rifles, VC, Sub-Hqrs. YMA leh MJA hotute an tel a ni.