No.1873/2021-2022

Lunglei the 16th August 2021 - Vawiin khan Co-operation Minister Pu C.Lalrinsanga’n Mizoram Co-operative Apex Bank (MCAB) Mobile ATM Van vailiamna MCAB Office, Venglai, Lunglei-ah a nei. Hemi puala inkhawmna hi Pi T.Lalmuanpuii, Apex Bank Chairman in kaihruaiin Champhai North bialtu MLA, Mizoram Cooperative Development Council Vice-Chairman ni bawk Dr. ZR Thiamsanga, Lunglei East bialtu MLA, HPC Vice Chairman Pu Lawmawma Tochhawng, Pu Lalrinsanga, Registrar, Cooperative Societies, official dangte, media mite, party hruaitute leh sawm bikdangte an tel a ni.

Pu C. Lalrinsanga chuan Mobile ATM Van chu Lunglei District-a la awm ngailo leh hmasawnna duhawm tak a ni tiin mipuite tana awlsamna leh remchanna thlentu pawimawh tak a nih ngei a beisei thu a sawi a. Hmasawnna reng reng cooperative movement hmanga kalpui a nih hian mipui thleng phak hmasawnna tak tak a thleng thin a ni tiin Mizoramah pawh cooperative movement pawimawhna leh tangkaina mipuiten kan in zir chho mekin Cooperative Society ten hma an sawn mek zel a. Cooperative Society hlawhtling tak taka kalpui mek zingah Mizoram Co-operative Apex Bank (MCAB) chu hmasawn chak leh Mizoram mipuite tana malsawmna nasa tak thlentu a ni chu chhuanawm a tih thu sawiin thawktute thawhrimna leh inpekna avangin an chungah lawmthu a sawi a. Mobile ATM Van chu mipuiten tangkai taka an hman theih turin a tlangzarh a ni.

Mobile ATM Van hi Financial Inclusion tih hlawhtlin a nih theih nana NABARD Financial Inclusion Fund (FIF) kaltlanga ruahma niin Bank leh ATM awm lohna hmuna chengten ATM hmanga Bank Service an chhawr ve theihna tura Apex Bank leh NABARD te thawhhona a ni. Mobile ATM pahnih a bultan niin Aizawl leh Lunglei District tana duan hmasak a ni a, a hlawhtlin dan a zirin NABARD chuan sponspor belh zel a in huam a ni. Mobile ATM hi Mahindra Bolero-a vuah niin, Apex Bank Account bakah bank danga account neite pawhin pawisa an la chhuak thei dawn a. He ATM ah hian English, Hindi leh Mizo tawnga hman theihna options te a awm a ni.