Vawiin chawhma dar 10:00 khan Deputy Commissioner, Saiha Office Chamber-ah District Disaster Management Committee an thukhawm. He Meeting ah hian tun hnai Dt 17.4.2009 zan-a thlipui leh ruahpuiin Saiha District chhung khaw hrang hrangte a nuai avanga in leh lo a tihchhiat te chhhawmdawl hnathawh dan tur te ngaihtuah a ni a, report a alan danin district chhung khaw thenkhat te chuan an tuar nasa hle a, Niawhtlang khua ah chuan In 135 te chu a tichhe vek a, Lungbun khua leh Chhuarlung khua ah te pawh In engemaw zat a ti chhe bawk a ni.

He thlipui leh ruahpuiin In leh lo a tihchhiat te hi report kimchang nghah mek a ni a, Vawiin Dt 20.4.2009 hian District bawrhsap Pu Rodney Lalrinawma leh Officer engemaw zat te chuan heng khua te hi a hmun ngei ah kal in an harsatna te sutkian dan tur an enpui dawn a ni. Chhawmdawlna hna chak taka kalpui a nih theih nan Committee chuan hma a la nghal a, tlawmngai pawl hrang hrang te chu phungbawm ah sawm in Insakna tur hmanrua Mau leh Thingte sat turin naktuk hian an kal dawn a, heng Mau leh Thing an sah te hi Department hrang hrang Motor in an phur dawn a, thlipui leh ruah in a tihchhiat nasat zualna khua Niawhtlang, Chhuarlung leh Lungbun khua ah te Insakna tur chak te hi an dah dawn a ni. Report kimchang hriat a nih hunah heng chhiat tawkte tanpui na tur hi sorkar chuan a rang thei ang berin a ngaihtuah nghal dawn a ni. Saiha khawpui chhungah pawh veng hrang hrang ah chenna In engemaw zat he thlipui hian a tichhe bawk a, mi tlawmngai ten chhawmdawlna hna hi an kalpui mek a ni.