District Education Committee vawi 30-na chu vawiin khan Champhai DC Conference Hall-ah neih niin, he hun hi District Education Committee Chairman leh DC Pu Vanlalngaihsaka'n a kaihruai a. He thutkhawmah hian Champhai District chhunga Elementary School 268 awm mek zirlai 15747 te zirna lama tih hmasawn an nih theihna tura hmalakna kalpui anih dan leh kum 2017-2018 sorkar kum chhung atana hmachhawp hrang hrangte tarlan a ni.
Vawiin thutkhawmah hian sorkar kum (2016-2017) kal mek a hmalakna tihhlawhtlin tawh District Project Director (SSA Mission) Pi K. Lalsiamliani tarlan langsar zual zingah Zirlai mamawh bikte tana mi 50 len theihna Residential Hostel Champhai-ah din anih dan te, naupang School kallo te tan Special Training from Mainstreaming of Out of School Children Khawzawl-ah kalpui anih dante, champhai District chhunga School kal rual naupang School kal lo te zawn chhuah beihpui thlak anih dan te, Zirlai naupang tinte dinhmun dik tak chhinchhiahna UDISE & SDMIS (Bio-data) siam anih dante, zirna tih changtlunna tura hmalakna thar Shaala Siddhi kalpui anih dante a tarlang a.
2015-2016 chhunga School sak thar 4, a pumpui a thuam that School 2 leh a chhelai thuamthat School 19 anih dan te, zirlai naupang 550 te tan Grassroots Football Training Centre 11 a kalpui anih dan te, pianphunga rualbanlo (Vohbik) naupang 945 te tana enkawlna bik siam anih dante, a thlawn a zirlaibu naupangte hnena sem anih dan leh zirlai naupang 14184 tan Rs 56.736 lakhs man School Uniform sem anih dante chu Pi K. Lalsiamliani chuan a sawilang tel bawk.
Kum 2017-2018 chhunga Champhai District chhung zirna in kawng hrang hrang (Access, Retention, Enhancing Quality, School Annual Grant, Social Category, School Infrastructure leh Project Management Cost) tih phuisuina tur (Annual Work Plan & Budget) Rs 2305.264 Lakhs chu pawm anih thu he thutkhawmah hian tarlan a ni a. Mid-Day Meal bikah zirna in 268 a zirlai naupang 15747 te chhun chaw ei tur leh siamtu mi 542 te hlawh senso pumpui chu Rs 295.94 lakhs chuang sen anih thu tarlan a ni bawk.
