Vawiin khan Social Welfare Department changtu Parliamentary Secretary Pu K.Lalrinthanga chuan MDTC (Multi Discipline Training  Centre) KVI Complex Zemabawkah ST Girls Hostel Building sak thar a hawng. 

Pu K. Lalrinthanga chuan hawnna inkhawmah hian mi tam takin eizawnna ngelnghet an neih theihna tura training na hmun MDTC KVI Complex ah hmeichhia hmun dang atanga rawn training te chenna tur Hostel Building tha tak sak ani chu lawmawm a tih thu a sawi a. Training turte pawhin sawrkar hmalakna nena inmil nakin zela eizawnna atana hman tlak tur thiamthil(skill) an thlan thiam a pawimawh a ni, a ti a. Parliamentary Secretary chuan Hostel building thar chu tangkai taka hmanga uluk taka enkawl turin KVI hotute leh zirlaite chu a chah a ni. 

He hunah hian Pu K. Lianzuala Mizoram KVI Board Chairman pawhin thusawiin MDTC chu Mizorama skill development training centre kan neih that berte zinga mi ani tiin tam takin thiamna an zirchhuahna hmun a ni, a ti a.  Pu K. Lianzuala chuan KVI Board Zemabawk atangin mi 1348 an training chhuah tawh thu leh tunah  discipline/skill 8- ah training an pek mek thu a sawi bawk a ni. 

ST Girls Hostel Building hi 894.5 sqm a zau niin chhawng li a sang a ni a, Dormitory 4 awmin khum 52 leng tura ruahman a ni. June 2017-a sak zawh  ST Girls Hostel MDTC, Zemabawk hi NECS sak a ni a, Ministry Of Tribal Affairs, Government of India in Tribal Hostel Scheme a neih atangin Social Welfare Department kaltlangin Project hi siam a ni a, he building sak nan hian cheng nuai 364.41 hman niin 100% Central Funding a ni.  

ST Girls Hostel Building hawnna inkhawmah hian Social Welfare Department Director Dr. Lalnunthara chuan kalkhawmte lawmna thu a sawi a, Pu Robert Romawia Royte ,Chief Managing Director NECS, chuan hostel building technical report kimchang a pe a. Pi A. Vanlazawni Deputy Director, Social Welfare Department chuan lawmthu sawina in hun a khar a. Bialtu AMC Councillor Pi K. Lalhmingliani chuan he hun hi hmanpuiin Social Welfare Department leh Mizoram KVI Board hotute an tel kim hle a ni. 

Attachment

  • Loading attachment...