Vawiin chawhma khan Information & Public Relations Department leh Mizoram Art Development Society (MADS) tangkawp buatsaih Art Workshop 2017 chu Archive Hall, Babutlang-ah hawnna hun neih a ni a. Planning & Programme Implementation Department Secretary, Dr C.Vanlalramsanga, IES chu Khuallian niin MADS Senior Adviser, Most Reverend Stephen Rotluanga chu Khualzahawm a ni.  

Dr C.Vanlalramsanga chuan Mizo zingah art lam abikin lemziak leh lemtuk ngaihhlutna chang hria kan pung zel chu lawmawm tiin hetiang workshop huaihawt ani chu zawngchhang tlak a tih thu a sawi a. Mizo zinga lemziak thiamte chu kan nunzia khawvel mithmuha phochhuaktu an nih thu sawiin art lam tui mite chuan milem pakhat atangin thil tam tak hmuin an zir chhuak thei a ni, a ti a. Kalkhawmte hnenah chuan an talent dawn te tipung zelin workshop pawh chhawr tangkai turin Planning Secretary chuan a fuih bawk a ni.

Khualzahawm Most Reverend Stephen Rotluanga chuan Mizoram Art Development Society (MADS) hnuaia lemziak leh lemtuk lama talent nei tha tak tak te an fuankhawm chu lawmawm atih thu sawiin workshop chu kalkhawmte leh mipuite pawhin an hlut ngei a beisei thu a sawi a. Art lama Mizo te’n hma kan sawn zel theih nan tan lak a ngaih thu a sawi a ni.

Mizoram Art Development Society (MADS) hi July 2012 khan din tan niin tun dinhmunah hian member 80 an awm mek a. He workshop hi July Ni 4-7, 2017 chhunga neih tur a ni.

He hawnna hun hi Information & Public Relations (I&PR) Director, Pi Lalnithangi chuan a kaihruai a, MADS President Pu H.K Jerry Ramliana hnen atangin thusawi ngaihthlak a ni a. MADS member zinga titha (degree nei) te chawimawina hun hman niin citation pek an ni a. Khuallian leh Khualzahawm te hi thilpek (lemziak) hlanna neih niin Information & Public Relations (I&PR) Joint Director leh Nodal Officer, Pi Lallianpuii chuan lawmthu sawina in hun a khar a ni.