2302/2024-2025

Dated Kolasib the 30th September, 2024; Vawiin chawhnu khan General Election to Sinlung Hills Council Final Electoral, 2024 tlangzarhna hun neih a ni a. Kolasib District huamchhunga Constituency pahnih 11-Saipum leh 12-Saiphai Constituency bial pahnih Final Electoral Roll chu Kolasib District Election Officer, Pu Robert C. Lalhmangaiha chuan DC Conference Hall-ah a tlangzarh.

Kolasib District Election Officer Pu Robert C. Lalhmangaiha chuan District Administration mawhphurhna a lak atangin inthlan pawimawh tak a vawihnihna tur chu Sinlung Hills Council General Election, 2024 hi a ni, a ti a. Village Council By-Election Kolasib District-ah District Election Office a thawktute leh mipuite zarah hlawhtling taka neih a ni tawh thu tarlangin, lawmawm a tih thu a sawia. Hlawhtling taka inthlanna nei thei tur chuan District Election Machinery-a thawktute chauh an pawimawh lova, MPF-te, Political Party hruaitute, kan NGO-te leh V/C-te, Local level a buaipuitute BLO-te chu a hnarkaitu an ni, a ti a. An mawhphurna te thatak leh felfai taka an hlenchhuah chuan inthlanna muanawm leh tha kan nei thei dawn a, chutiang tur chuan kan inbeisei a ni, a ti. He inthlanna tura mawhphurtute chu theihtawp chhuah turin a sawm nghal bawk. Mipuite pawhin thataka an vote an thlak theih nan leh hruaitu thatak an thlan chhuah theih nan mawhphurna pawimawh tak an neih theuh tih hria a , Election Commission-in inkaihhruaina a duante tha taka zawm turin a chah nghal bawk a ni.

Kolasib DEO chuan, District Election Office lama EO leh a thawhpuiten General Election to Sinlung Hills Council inthlanna hlawhtling tak a awm theih nan theihtawp an chhuah thu leh ERO, AERO te an fakawmin chhuanawm a tih thu a sawi a. An hmalakna zarah Final Roll peih fel a ni thei chu an thawhrimna zarah a ni a ti a. Mipuite pawhin thatakin an lo thlawp avangin Roll peih fel a ni chu thinlung takin lawmawm a tih thu a sawi bawk.

Vawiina tlangzarh tak General Election to Sinlung Hills Council Final Electoral Roll, 2024-ah hian 11-Saipum Constituency ah Vote nei mipa 1134 leh hmeichhia 1161, an vaiin mi 2295 an awm a; Draft Roll atanga thun thar 132 awmin, Draft Roll aia a punna hi (6.10%) a ni. 12-Saiphai Constituency-ah mipa 1329 leh hmeichhia 1319, an vaiin mi 2648 an awm a; Draft Roll atanga thun thar 85 awmin, Draft Roll aia a punna hi (3.32%) a ni. 11-Saipum Constituency a hian Polling Satation pathum heng Saipum-I, Saipum-II leh Chawnpui Polling Station te an awm a. 12-Saiphai Constituency-ah Polling Station pali : Saiphai-I, Saiphai-II, Phainuam leh Saihapui (V) Polling Station a awm a ni.