4056/2023-2024

Hnahthial the 6th March 2024: Vawiin khan National Service Scheme (NSS), Govt Hnahthial College leh District Election Office, Hnahthial tangkawp chuan Government Hnahthial College auditorium-ah “Mera pehle vote, Desh ke liye”; ram pum huap zirna sang zawka zirlai ten vote thlak pawimawhna an hriat a, an ngaihpawimawh zual theih nana inzirtirna hun an buatsaih a, he hun hi Asst Professor, NSS Nodal Officer ni bawk Pu Vanlalrova Varte chuan kaihruaiin Govt Hnahthial College Principal chuan kalkhawmte lawmna thu a sawi.

Resource person Dr Robert Sanglora Khawbung, Asst Professor, GHC chuan India ramin democracy a neih chhoh dan te tarlangin mitin intluktlanna, kum 18 tling tawh phawt tan chuan ram inrelbawlna kawnga ngaihdan leh value system phochhuahna a ni a ti a, mipui thlan sawrkarna ram nih chu a hlu hle tiin duhthlanna fim tak nena vote thlak chu mipui dikna chanvo leh tihtur makmawh a ni a ti bawk. Democracy chuan sawrkar dik leh langtlang a hring thin tiin sawrkar hna thawktute pawh nasa takin an tan phah thin a ti bawk a, vote thlak chu democracy tihchakna a ni tiin mipuiin ngaihlu leh zual theuh se, ram leh hnam tan vote thlak ngai pawimawh zual theuh turin kalkhawmte a chah a ni.

DIPRO, Pi K Ngosai, District SVEEP Nodal Officer pawhin thu sawiin nikum MLA inthlanpuia vote tlak dan te a tarlang a, rampum huap ang pawn a tha thawkhat hle tiin thalaite inpekna vang a ni a ti a, MP election hnuhnung berah Mizoram pum huapin vote a tla chhe hle tih tarlangin kumin inthlanah chuan theihtawp chhuahpui turin a ngen bawk.

District Election Office, Hnahthial atangin Pu Vallalrohlua, DEO chuan EVM Demonstration a nei a, EVM khawl te sawifiahna neiin zawhna leh chhanna hun a hmanpui bawk. Vawiin campaign ah hian zirlai tam tak ten vote an thlak chhin a , a bikin kum 18 tling hlim, kumin election a vawi khat vote thlak tu tur ten EVM chu hmet chhinin hun hlawkthlak tak an hmang ho a ni.