1362/2022-2023

Khawzawl, the 26th July, 2022: State Election Commission thuchhuah angin Khawzawl District chhunga Sialhawk leh Aiduzawl khuaahte VC by-election neih tur a ni a, hemi atana inpuahchahna kalzelah vawiin chawhma dar 10:00 khan District Election Officer, Pu C.C. Lalchhuangkima chuan VC by-election neihna tur khuaa draft electoral roll-te chu DC Conference Hall-ah a tlangzarh a, draft electoral roll tlangzarh tak chhutchhuah copy chu pollitical party aiawhte a hlan nghal a ni.

District Election Officer Pu C.C. Lalchhuangkima chuan inthlanna muanawm leh hlawhtling tak buatsaih a nih theih nan Sawrkarin ngaihtuahna nasa tak a seng thin a, inthlan buaipuitute pawh kan fimkhur a ngai thin hle a ni, a ti a. Inthlanna thianghlim leh felfai tak a awm theih nan mipuite an pawimawh thu sawiin, draft roll pekchhuah atangin uluk takin mahni khua theuha voter-te kim leh kim loh hriatchian tum a tul thu leh, tih sual awmte pawh inthlan buaipuitute hnena thlen zel a tul thu a sawi bawk. 

He hunah hian Pu James Lalnithanga, Asst DEO in report tawi a pe a. Draft electoral roll tlangzarhna hunah hian AERO, ERO, VLO leh Political party hrang hrang aiawhte an tel a ni.

Vawiina draft electoral roll tlangzarhin a tarlan dan chuan Sialhawk khuaah hian vote nei mi 1,678 an awm a; heng zinga 815 hi mipa niin, 863 dangte chu hmeichhia an ni a. Aiduzawl-ah hian vote nei mi 217 an awm a; heng zinga 108 te hi mipa niin, 109 te chu hmeichhia an ni.

Sialhawkah hian VC seat 5; General seat 4 leh Reserved seat 1 a awm a. General seat atanga tling VC member 1 boral avangin he seat ruak hi hnawhkhah a ngai a. Aiduzawl khuaah hian VC seat 3; General seat 2 leh Reserved seat 1 a awm a, General seat atanga tling VC member 1 boral avangin a hnawhkhat turin inthlanna buatsaih a tul ta a ni.

Ruahman dan chuan vawiin July ni 26, 2022 hian draft roll hi tlangzarh a ni a. Vawiin atanga tanin July ni 31, 2022 thlengin claims & objections period hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni ang a. Thla thar August ni 3, 2022 thleng hian dilna lut leh siamthat tulte chinfel vek hman tum a ni a. VC by-election neih huna hman tur VC electoral roll thar ber chu August ni 8, 2022 hian tlangzarh tum a ni.


Attachment

  • Loading attachment...