1361/2022-2023

26.7.2022, Aizawl: Nimin khan, NHIDCL-in lamlian an sialna leivung paihin environment a tihchhiat chungchang enpui tura ruat "State level Committee" chu an Chairman Pu K. Lalsawmvela, Adviser to Chief Minister (Technical) hovin Chief Minister Conference Hall-ah khan an thukhawm.

He meeting-ah hian district level-a NHIDCL hna thawh enpui tura ruat, 'District Level Monitoring Committee' leh Divisional Forest Officer ten an bial theuhva leivungin environment a nghawng dan te, leivung paihna hmun tura ruat enkawl dan leh dan bawhchhiatna hrang hrang awm thei te an zirchianna report bakah 'Save Mizoram Rivers' pawl-in an thil hmuhdan an report chu sawiho a ni a. NHIDCL Contractor-ten an remchan dan ang apianga leivung an paih mai nia lang chuan ram leilung leh lui nasa takin a tichhia tih chu Committee hmuh dan a ni a. NHIDCL lamin mimal ram leh Reserve Forest ram inbukthuah nia a lan vanga compensation lam an tihfel mai theih loh thu leh, Forest Department atanga hna thawh phalna an dil an hmuh har avanga harsatna an tawhte an sawi bawk.

Kawng hrang hranga sawiho a nih hnuah, "Kan ram chhunga National Highway-te hi chak leh tha taka thawh zawh a nih theih nan Pawl hrang hrang ten mahni mawhphurhna theuhah intawiawmna tha tak nen theihtawp chhuah tlan ni sela. Compensation leh Forest Clearance chungchang pawh a rang lama mawhphurtuten tihfel ni se. NHIDCL pawhin an contractor-te dan bawhchhia chu hremna lekin, tun hnuah leivung paihna hmun tura ruat, dan ang taka buatsaihah chauh leivung paih tawh se" tiin rel a ni a. NHIDC Executive Director pawhin, thla 2 hun pe tura ngenin, chumi chhunga theihtawpa hma la turin a intiam a. Thla hnih ral hnuah State level committee chu thutkhawm leh ni se tiin rel a ni.

He meeting-ah hian Principal Secretary, Environment, Forest & Climate Change te, Secretary PHE te, Engineer-in-Chief, PWD te, Deputy Commissioner Aizawl, Saitual leh Champhai te, Secretary, Mizoram Pollution Control Board te, Lunglei leh Serchhip D.C aiawh te, GAD leh Save Mizoram Rivers aiawh te an tel a ni.