Vawiin hian Serchhip District Executive  Committee on DAY NULM te chu an Chairman Pi Sangchhin Chinzah, Serchhip Bawrhsap ni bawk hovin an thukhawm a, DAY NULM Component; Shelter for Urban Homeless hnuaia Shelter Home sak mek leh City Livelihood Centre a taka kalpui chhoh dan tur an rel.

Chairman Pi Sangchhin Chinzah chuan, khawpuia mirethei zawkte, chenna neilote, hnathawh tur mumal neilote, insakna neilote hmakhaw suih nan sawrkar chuan hma nasa takin a la mek a. Serchhip District ah pawh hmalakna tam tak a nei a, chung hmalakna te chu keini hi a taka thawktute kan ni. A taka thawktuten hmalakna hmantlak, rahchhuak tlak ngeia hma kan lak a tula, chuvang chuan ruahmanna pawh fel tak kan neih a tul a ni, a ti a. District Executive Committee member kalkhawmte chungah lawmthu a sawi bawk.

DAY-NULM hnuaia Shelter for Urban Homeless hnuaiah hian UD&PA Serchhip hian Social Welfare Department te nena thawh hona siamin tunah hian Serchhip P&E Veng ah Shelter Home Rs. 20.08 lakh senna tur sak mek a ni a. He Shelter Home sak hi UD&PA in Shelter for Urban Homeless fund hmanga sain a luah leh enkawl zui hna chu Social Welfare ten an bawhzui thung dawn a ni. He Building sak mek hi tlema tih danglam ngai, Toilet hunna siamrem ngai a awm avangin vawiina meeting hian naktuk zingah a hmuna ena hmalak dan tur sawi ho nise, tiin an rel a ni.

Tin, City Livelihood Centre dinna tur pawh Serchhip District ah Rs. 10 Lakh hmuh a ni bawk a. He Centre a taka kalpuina tura proposal buatsaih niin sawi ho nghal a ni. He Centre hi a nihna takah chuan nitin hnathawh tur nei mumal lote hnathawh tur zawn saka, a tul ang zela tanpui tu tur office/centre a ni a. Chung hnate bakah chuan internet hmanga mipuite mamawh hna chi hrang hrang thawh sak thei tura duan a ni. Vawiina meeting hian sum awm chhun hmang he City Livelihood Centre (CLC) kum thum chhung amaha kala, a hnu zela amaha a inenkawl zui theih dan tur ruahmanna chipchiar tak (detail propossal) siamin, thuneitu sang zawkte hnena thlen a ni ang a, an nin an lo pawm chuan a taka kalpui nghal a ni tawh dawn a ni.

Serchhip khawpui leh Serchhip District chhungah hian Urban Development & Poverty Alleviation Department hian hmalakna an nei tam hle a, heng an hmalakna hrang hrangte hi Department in chak zawka a enkawl theih nan tunah hian District Urban Development Officer's Office hawng turin chak taka hmalak mek a ni a, reiloteah Serchhip hian DUDO Office a nei thuai tawh dawn a ni.