Mizoram BJP Vigilance Cell chuan kum 2015-16 inkara Aizawl Road South Division huam chhunga retaining wall hmun 25 a siam ah thil dik lo a awm nia hriain hemi chungchang hi ACB in chhui chiang turin August ni 22 khan FIR an theh lut nia tualchhung chanchinbu thenkhat ah a lo lan avangin Mizoram PWD chuan thil awm dan dik tak sawifiah tulin a hria a.

Hemi chungchangah hian thil awm dan chu hetiang hi a ni. Pi Lalrinkimi, Maubawk chuan kum 2015-2016 chhunga  Aizawl Road South Division huam chhunga  retaining wall siamna hmun leh estimate amount te ni 3.8.2017 khan RTI hmangin zawhna a theh lut a. Aizawl Road South Division chuan August ni 8 khan heng retaining wall siamna hmun 25 te leh hnathawhna atana sum senso zat te tarlangin RTI hmanga zawhna a chhang tawh a.  Mizoram BJP Vigilance Cell ten heng retaining te hi hmu lova insawiin FIR an theh lut ta mai hi Mizoram PWD chuan pawi kan ti takzet a. Heng retaining wall siam te hi a hmunah Mizoram BJP Vigilance Cell te nena enho tura Aizawl Road South Division hotute sawmna an pawm duh tak loh avangin mimal leh pawl, chanchinbumi te, a duh apiangin heng retaining wall te hi a hmunah ngei en theih a ni tih Mizoram mipuite kan hriattir a, a document te pawh Aizawl Road South Division Office ah a en theih reng e.