Vawiin chawhnu dar 1:00 khan Cultural Heritage Center, Lunglei-ah DRDA, Lunglei buatsaihin Sawrkar Laipui hmalakna thar pawimawh tak Sankalp Se Siddhi Abhiyan (Attainment Through Resolve) New India Movement 2017-2022 programme hman a ni. LAD Minister leh Lunglei North Assembly Constituency bialtu MLA ni bawk Pu PC Lalthanliana chuan khuallian niin a hmanpui. He hunah hian sawrkar department hotute bakah Lunglei District chhunga khawtlang hruaitu VC-te thanhnem tak an kalkhawm a ni.  

Vawiin Sankalp Se Siddhi Abhiyan programme-ah hian Pu PC Lalthanliana chuan New India Movement thutiam (Pledge) 2017-2022 sawihona a kaihruai a. Kalkhawmte chuan India ram chu ram fai tak; retheihna,eirukna leh helpawl awm tawh lohna; chi bing leh hnam bila inthliarhran awm tawh lohna, ram thara siam turin India khua leh tui nihna angin mawhphurhna ka nei tih ka pawm e, tiin thu an tiam a ni.

Pu PC Lalthanliana chuan he hunah hian thu sawiin India ram hmel thar siam tur chuan hnam hrang hrang leh sakhaw hrang hrang te zalen taka an awmho tlan theih a pawimawh hmasa ber a ni, a ti a. Khawtlang hruaitu VC kalkhawmte hnenah fuihna thu sawiin Minister chuan Village Council hruaitute chu sawrkar hmalakna hrang hrangah a bulthuta awm, mipui dinhmun hrechiang ber tu leh mipuite ngheng hnai ber tu an nih avangin ram hmasawnna kawngah leh remna leh muanna humhalh kawnga an pawimawh zia leh an mawhphurhna a san zia hre nawn fo thin turin a chah a.  VC-te chu thuneihna tam zawk leh sang zawk pe turin sawrkarin ruahmanna a siam mek a ni tiin Minister chuan Sawrkar Laipui hotute hnenah hemi chungchang hi thlen a nih tawh thu a sawi a. VC hruaitu kalkhawmte chu an hnathawhna leh mipui an kaihhruaina kawngah hmathlir thui tak nei thin tura chahin Pu PC Lalthanliana chuan tan rualna leh inhriatthiam tawnna boruak tha hnuaiah chuan an Village Council huamchhungah hmasawnna nasa tak an thlen theih ngei a beisei thu a sawi bawk. 

Vawiin Sankalp Se Siddhi Abhiyan programme Lunglei DRDA Project Director Pu K. Lalrohlua kaihhruaiah hian Lunglei Deputy Commissioner, Pi Lalzarmawii, IAS pawhin thu sawiin India ram hmel thar siam tura thutiam sawiho chu a taka nunpui a, mahni thawhna hmun theuha tan la thar turin kalkhawmte a chah a. Sawrkar hmalakna kalpui mek leh hmachhawpte ti hlawhtling turin khawtlang hruaitu VC-te chu thawhho puiah sawmin Pi Lalzarmawii chuan New India Movement 2017-2022 thiltumte chu an Village Council huamchhung, an khua leh veng theuha nasa taka thehdarh turin a chah bawk.

Lunglei District chhunga Centrally Sponsored Scheme (CSS) PMAY-G leh MGNREGA hnuaia hmalakna sawifiahna hun Pi Helen Zomuanthangi, APO(M), DRDA leh Pu C. Biakchungnunga, A.M (MGNREGA) ten an hman bakah Village Council hotute pawhin an thil vei zawng leh harsatna an tawhte an sawiho bawk a ni.