Nimin (24.2.2016) chawhnu khan Champhai District Fire Prevention Committee chuan an Chairman Champhai DC Pu Vanlalngaihsaka hovin Zokhawthar YMA Hall-ah Kangmei laka fimkhur tura inzirtirna hun a hmang.

Champhai DC chuan Champhai District Magistrate anih anga February 2, 2016 a thuchhuah a lo siam tawh chhunzawm nan Lo, Huan leh Leipui hal avanga mipui nunphung pangngai a buai loh nan te, mihring leh nungchate tana harsatna a thlen lohna tura thupek a chhuah chu khauh taka kenkawh anih tur thu a puang nawn leh a. Lo, Huan leh Leipui hal tur reng rengin March 15, 2016 (Nilaini) hmain a hal vek tur anih thu te; Lo, Huan leh Leipui hal tur reng rengin vah bak ram an tih kan lohna turin Meikawng tha tak a sial fai lawk tur te; Fimkhur tawk loh vanga kangmei ti chhuak chu dan dinglai anga na taka hrem an nih tur thu te; Lo, Huan leh Leipui tur vah bak tih kan phal anih loh thu leh mahni vah bak tikang an awm pawhin hmanzui phalsak an nih loh tur thu te a sawi a.

DC chuan VC leh khawtlang tangrualin theihtawp a tan an lak pawh a Ram kang a lo awm palh pawhin a rang thei ang bera thelh ngei ngei tur anih thu leh Ram tikangtu chu chu zawng chhuak a, hrem ngei ngei tur anih thu a sawi a. Chutianga tiduhlo khua an awm anih chuan Mizoram sorkar thupek dinglai tlawh chhanin chung khua chu Development kawng hrang hrangah Sorkar-in a hrek theih thu leh Ram kan chhiat manah chung khuate chu Sorkar-in awm atih zat a chawitir dawn thu a tarlan bakah Sorkar-in Ram kangchhe tur danna leh hriattirna thupek atih chhuah chi rang hrang 15 te chhiar chhuahna a nei bawk.

Kangmei laka fimkhurna in zirtirna hun hi Champhai DLAO Pi V.Lalmuanpui'n kaihruaiin, Champhai ACF Pu PC Laltanpuia'n kangmei laka fimkhur a pawimawhna leh ram kangin mihringte leh nungchate tana chhiatna a thlen theih dan kawng hrang hrang tarlanna a neih rualin Ram tikangtu chu Hnam hmelma anih thu a tarlang bawk.

He hunah hian District level Fire Prevention Committee memberte leh DC Office-a Officer te leh thawktute an kal tha hle a ni.